Истрагата откри дека Ендру Маунтбатен-Виндзор примил милиони фунти од олигарх кој користел средства од компанија поврзана со корупција за да ја купи неговата поранешна вила, објавува „Би-би-си“.
Казахстанскиот милијардер Тимур Кулибаев преку своите адвокати изјави дека користел заем од „Енвиро Пацифик Инвестментс“ за да ја купи вилата во Санингхил Парк во англискиот округ Беркшир од тогашниот принц Ендру за 15 милиони фунти. Италијанските обвинители подоцна открија дека компанијата примила мито како дел од корупциска шема што датира од 2007 година.
Според наодите на италијанските обвинители од серија судски случаи спроведени во 2016 и 2017 година, „Енвиро Пацифик Инвестментс“ примила средства поврзани со мито преку друга компанија, „Авентал“. Во еден случај, италијанскиот нафтен бизнисмен Агостино Бјанки се изјасни за виновен за плаќање мито на Кулибаев и други казахстански функционери во врска со профитабилни договори за нафта, додека Кулибаев не беше обвинет.
Документите покажуваат дека најмалку 1,5 милиони долари биле префрлени меѓу поврзани компании, а последната уплата била извршена во април 2007 година, помалку од два месеци пред потпишувањето на договорот за купопродажба на паркот Санингхил. Иако истрагите во Италија не доведоа до обвиненија против Кулибаев, обвинителите заклучија дека постојат сериозни индикации за корупција.
Кулибаев беше зет на тогашниот претседател на Казахстан Нурсултан Назарбаев и еден од највлијателните луѓе во нафтениот и гасниот сектор во земјата, како и висок функционер на државниот фонд Самрук-Казина. Тој ја купил вилата преку офшор компанија, Јунити Асетс Корпорејшн.
Според „Би-би-си“, Кулибаев платил околу три милиони фунти повеќе од бараната цена и дури седум милиони повеќе од проценетата пазарна вредност на имотот. Вилата, која кралицата Елизабета II му ја подари на Ендру како свадбен подарок во 1986 година, стоеше празна со години по продажбата и беше срушена во 2016 година.
Адвокатите на Тимур Кулибаев негираа каква било вмешаност во корупција, изјавија дека тој никогаш не ја поседувал или контролирал „Енвиро Пацифик Инвестментс“ и потврдија дека кредитот е добиен под „чисто комерцијални услови“ и подоцна бил отплатен со камата. Тие исто така нагласија дека сите средства што се користеле за купување биле легални.
Нема докази дека тогашниот принц го знаел потеклото на парите што Кулибаев ги користел за да го плати имотот. Сепак, експертите за борба против перење пари велат дека трансакцијата имала бројни „црвени знамиња“, вклучувајќи ја политичката позиција на купувачот, употребата на офшор структури, надуената цена и недостатокот на транспарентност околу идентитетот на купувачот.
Експертот за финансиска безбедност Том Китинг рече дека договорот требало да предизвика обемна длабинска анализа за да се спречи „перење пари од корупција“. Британската пратеничка и активистка против корупцијата Маргарет Хоџ рече дека е „шокирана“ од откритијата и повика на парламентарна и институционална истрага.
Ендру Маунтбатен-Виндзор, Бакингемската палата и адвокатската фирма „Фарер и Ко“, која го застапуваше продавачот, одбија да коментираат за случајот.
