Привремената претседателка на Венецуела сака дијалог со опозицијата

Привремената претседателка на Венецуела, Делси Родригез, предложи дијалог со опозицијата, три недели по американската операција за апсење на претседателот Николас Мадуро.

„И покрај нашите разлики, мора да се сретнеме и да постигнеме договори. Зошто? Па, за народот на Венецуела“, изјави Делси Родригез на националната телевизија во саботата, објавија денес француските медиуми.

Според уставот, нејзиниот привремен претседателски мандат може да трае шест месеци, сè додека не се одржат нови избори.

„Не може да има политички или партиски разлики кога станува збор за мир во Венецуела“, додаде таа.

Неколку илјади поддржувачи на Николас Мадуро повторно демонстрираа во петокот во Каракас и други градови, барајќи враќање на соборениот претседател и неговата сопруга.

Делси Родригез го замоли претседателот на парламентот, нејзиниот брат Хорхе Родригез (Хорхе), во петокот да закаже состанок со различните политички групи, велејќи дека „сака дијалог со конкретни и непосредни резултати“.

„Тоа мора да биде венецуелски политички дијалог каде што повеќе нема да се наметнуваат надворешни наредби, без разлика дали од Вашингтон, Богота или Мадрид. Национализиран политички дијалог кој е за општото добро на Венецуела“, рече Делси Родригез.

Од нејзината инаугурација на 5 јануари, Делси Родригез, под притисок од САД, вети дека ќе ослободи политички затвореници, потпиша договори за нафта со Американците и започна реформи, вклучително и закон за јаглеводороди.

Благодарение на оваа реформа, која има за цел целосно да го отвори секторот за приватни инвестиции, Венецуела има намера да го зголеми производството на нафта за најмалку 18 проценти до 2026 година, изјави во саботата шефот на државниот нафтен гигант Петролеос де Венецуела (PDVSA), Хектор Обрегон, пренесе „Бета“.