Американскиот министер за одбрана Пит Хегсет изјави дека неговото министерство моментално работи на преглед на податоците поврзани со наводното постоење на вонземски форми на живот, нагласувајќи дека не очекувал дека ќе се занимава со тоа прашање како ресорен министер.
Како што објавија светските агенции, Хегсет, одговарајќи на прашањето дали постојат вонземјани, изјави дека неговиот тим веќе ја анализира достапната документација.
„Нашите луѓе работат на ова токму сега. Не сакам однапред да кажам колку време ќе трае, но веќе почнуваме“, рече тој, додавајќи дека не можел да замисли дека објавувањето на досието за можен вонземски живот ќе биде дел од неговите службени должности. Изјавата повторно ги разгоре шпекулациите што ги прогонуваат американските воени и разузнавачки структури со децении, особено кога станува збор за наводни тајни програми и документи на Пентагон.
Тврдењата на режисерот Марк Кристофер Ли, кој објави за британски таблоид дека на 8 јули 2026 година, американскиот претседател Доналд Трамп ќе се обрати на нацијата, како што рече, „најважната изјава во човечката историја“, исто така привлекоа дополнително внимание на јавноста.
Споменатиот датум не е случаен – токму на 8 јули 1947 година, светот првпат дозна за таканаречениот инцидент Росвел, кога во американската држава Ново Мексико беше пронајден материјал, за кој првично беше наведено дека е од „летачка чинија“. Американските власти подоцна објавија дека станува збор за воен балон, но настанот остана една од најпознатите мистерии на 20 век.
Темата за вонземјаните претходно ја отвори во јавноста поранешниот американски претседател Барак Обама, кој во едно интервју зборуваше за неидентификувани летала и постоењето на документи кои сè уште не се целосно објавени. Во таа прилика, Обама ја спомена и познатата Област 51, таен воен комплекс во Невада, која со години е предмет на бројни теории за експерименти и наводно криење докази за вонземски живот.
Самиот Трамп претходно изјави дека ќе стави на располагање на јавноста одредени информации од Пентагон во врска со оваа тема, оценувајќи дека станува збор за „многу интересно и важно прашање“.
Иако конкретните докази за постоење на вонземски живот досега не се официјално потврдени, сè почестите изјави на високи американски функционери за преглед на тајни досиеја покажуваат дека темата повеќе не е исклучиво дел од популарната култура и теориите на заговор, туку е и предмет на институционален интерес.
Дали најавените откритија ќе донесат дефинитивни одговори или само нови прашања, останува да се види.
