Принцот Вилијам: Вистинска национална катастрофа е што проблемот со самоубиствата на мажи во Велика Британија не се решава доволно

Принцот од Велс отворено зборуваше за времето што му било потребно за да ги разбере своите чувства во искрено интервју за „Би-би-си“ за менталното здравје.

Во специјална епизода на „Би-би-си Радио 1“, тој рече дека ни требаат „машки модели на улоги“ кои ќе зборуваат за своето ментално здравје за да ги инспирираат другите мажи да го сторат истото.

За време на панел-дискусијата за машкото самоубиство, принцот Вилијам рече дека ваквите отворени дискусии треба да станат „втора природа за сите нас“ и ги сподели своите стратегии за справување со своите чувства.

Менталното здравје е тема блиска до срцето на принцот, а неговата Кралска фондација инвестира 1 милион фунти (околу 1,17 милиони евра) во развојот на Националната мрежа за спречување на самоубиства, пренесе „Би-би-си“.

Според Канцеларијата за национална статистика, самоубиството било водечка причина за смрт кај лицата на возраст од 20 до 34 години во Англија и Велс во 2024 година.

Принцот Вилијам рече дека е „вистинска национална катастрофа“ што проблемот со машкото самоубиство во Велика Британија не се решава доволно.

„Ми требаше долго време да ги разберам моите чувства и зошто се чувствувам така и мислам дека тоа е навистина важен процес – од време на време да се проверувате себеси и да разберете зошто се чувствувате така.

Понекогаш има очигледно објаснување, понекогаш нема. Верувам дека менталното здравје е привремено, може да имате голем момент на криза на менталното здравје, но ќе помине“, рекол принцот Вилијам за своите чувства.

Принцот од Велс ги охрабри луѓето да „научат да се сакаат себеси и да се разбираат себеси“ и ја нагласил важноста на споделувањето на своите чувства.

„Дел од чувството на удобност во разговорот за менталното здравје е разбирањето на себеси“, рече тој.

Прашан дали неговите деца отворено зборуваат за своите чувства, принцот се пошегувал дека понекогаш тие зборуваат премногу. „Ги добивам сите детали, што ми се допаѓа, неверојатно е“, рече принцот Вилијам.

Во панелот беа вклучени и Алан Браунриг, директор на клинички услуги во добротворната организација „Џејмс Плејс“, музичарите професор Грин и Гувна Б, и еден млад човек по име Натан, кој ги сподели своите лични искуства.

Принцот Вилијам редовно зборува за менталното здравје и влијанието на самоубиството кај мажите, а новата Национална мрежа за спречување на самоубиства, која обединува 20 организации, ја води професорката Ен Џон, експерт за спречување на самоубиства и советник за јавно здравје во Велс.

Кралската фондација нагласува дека спречувањето на самоубиства е „комплексен предизвик“ и дека не постои единствен модел на поддршка, но дека новата мрежа ќе се обиде подобро да ги разбере корените на проблемот и да им обезбеди поддршка на засегнатите, пренесува „Танјуг“.