Приказна за напредната визија на основачот Станко Караман

Годинава, скопската Зоолошка градина слави 100 години од своето постоење. Нејзин основач е биологот, научник и визионер Станко  Караман. Во октомври 1926 година, тој ја поставил основата на Зоолошката градина, во рамките на Градскиот парк. Неговата визија била јасна и напредна за тоа време, ЗОО Скопје да биде современ простор за едукација, научен пристап и за хуман однос кон животните.

– Во период кога ваквите концепти биле реткост, Зоолошката градина била замислена како живо училиште на отворено, место каде што генерации деца и возрасни ќе учат да ја разбираат и почитуваат природата. Паралелно со тоа, Караман има значајна улога и во развојот на Природонаучниот музеј на Македонија, заокружувајќи ја својата идеја во која науката и јавниот интерес одат рака под рака. Заедно со музејот и со Зоолошката градина, тој е основач и на Градскиот парк во Скопје – наведуваат од управата на Зоолошката градина.

Како истакнат зоолог, Караман верувал дека науката, едукацијата и хуманиот однос кон животните мора да бидат достапни за јавноста и вградени во секојдневниот живот на градот.

Дошол во Македонија во 1924 година, работејќи на ихтиофауната и  објавувајќи ја својата студија „Pisces Macedoniae“. Објавил повеќе од 120 научни труда во кои ја обработил таксономијата на рибите, птиците, влекачите и на многу групи од раковидните организми. Најголемиот број од новоопишаните видови и подвидови го носат името Македонија, реката Вардар и големите планински масиви во Македонија. Опишал повеќе од 60 вида и подвидови. Основач е и на музејските списанија „Acta“ и „Fragmenta balkanica“.

По 100 години постоење, Зоолошката градина – Скопје останува живо наследство на идејата на Станко Караман, визија што од 1926 година до денес ја негува истата вредност: знаењето, почитта и грижата за природата се темел на одговорно општество.