Презентирани традиционални македонски носии во гимназијата во Пустец

Македонското друштво „Сонце“ продолжува со промоцијата на македонски традиционални носии, во чии рамки претседателот на друштвото, Васил Стерјовски, беше во гимназијата „Трајан Ѓорѓиовски и Митре Колевски“ во Пустец.

Тој им ги претстави на учениците и на професорите во училиштето машките носии од Преспа, но и брошурата за народните носии, чиј автор е токму тој, при тоа посочувајќи дека со „гордост го претставуваат ова достигнување за нашиот македонски идентитет“.

– Македонската заедница во регионот Корча го зачува своето јазично и културно наследство со посветеност и достоинство. Регионот на Преспа, со девет села во рамките на Општина Пустец и селото Врбник во Општина Девол, претставува историски центар на оваа домородна заедница, официјално признаена од албанската држава – истакна Стерјовски.

Според него, и покрај политичките, социјалните и економските предизвици низ годините, оваа заедница им останала верна на својот јазик, традициите, религиозните обреди, фолклорот и на вредностите пренесувани од генерација на генерација.

Додаде дека традиционалната македонска носија од Преспа е одраз на занаетчиството, единствената естетика и на длабоката духовна симболика.

Нагласи дека традиционалната македонска носија од Преспа не е само облека туку и знак на идентитет и гордост, симбол што добива целосно значење кога се прикажани маж и жена облечени заедно, одразувајќи ги семејното единство, социјалната хармонија и континуитетот на преспанската традиција.

– Традиционалната народна носија за мажи во Преспанскиот Регион што ја презентираме претставува драгоцено културно наследство, каде што секој елемент носи специфична функција и симболика. Оваа носија, која беше речиси загубена во областа, е пресоздадена благодарение на проучувањето стари фотографии и консултациите со експерти од областа, враќајќи ја во нејзината оригинална форма што се користела сè до по Втората светска војна – вели Стерјовски.

Притоа потсети дека минатата година, Македонското друштво „Сонце“ репродуцирало четири женски народни носии од областа на Преспа, кои сега ги користи фолклорна група од Преспа.

– Со додавањето на четирите машки носии што ги претставиме, се создава комплетна фолклорна група, која достојно ќе го претставува преспанскиот крај на разни активности дома и во странство – рече Стерјовски.

На настанот присуствуваа и се обратија и заменик-градоначалникот на Општина Пустец – Атанас Плоча, директорот на гимназијата – Трајан Вангеловски, како и Лазо Стојани, раководител на фолклорната група „Преспа“.