По текстот на Душан Јовановиќ „Животот на провинциските плејбои по Втората светска војна“ во Драмскиот театар во Скопје започна подготовката за претставата во режија на Иван Пеновиќ.
Директорот на Драмски, Роберт Вељановски, во присуство на министерот за култура и туризам, Зоран Љутков, директорката на Љубљански општински театар (МГЛ) Барбарa Хиенг Самобор, и директорот на Белградски драмски театар (БДП), Југ Радивојевиќ, денеска го најави почетокот на пробите за првата копродукциска претстава помеѓу членките од Регионалната унија на театри. Во копродукцијата учествуваат трите театри: Драмски театар Скопје (ДТС), Белградски драмски театар (БДП), Љубљански општински театар (МГЛ) и четвртиот партиципиент ЈУ Будва Град театар.
Улогите во претставата им се доделени на актерите: Марјан Наумов, Јована Спасиќ, Лазар Христов, Марко Гверо, Иван Томиќ, Соња Стамболџиоска, Нејц Језерник, Јулита Кропец и Лазар Николиќ. Во уметничкиот дел од екипата се: сценографот Лазе Трипков, костимографот Александар Ношпал, композиторот Владимир Пејковиќ, а за сценските движења е задолжен Дамир Клемениќ. Преводот го направи Соња Должан. Инспициент на претставата е Жарко Намичев, а суфлер Милка Анчевска.
Режисерот Иван Пеновиќ, најавувајќи ја претставата вели: „Комедијата ‘Животот на провинциски плејбој или сакаме што е мое, не го даваме’ на прв поглед донекаде се издвојува од раниот драмски опус на Душан Јовановиќ, одржувајќи ја формата на комедијата сосема верно. Тој дури се потпира на текст наречен „Трите курови“ од непознат автор, кој припаѓа на традицијата на комедијата дел арте. „Плејбојс“ е напишан во 1972 година и за првпат настапи во МГЛ една година подоцна. Напишани се во духот на сексуалната револуција и пролетта ‘68 година, како и под влијание на околностите во тогашна Југославија на кои реагираа уметниците од најмладата генерација. Во нивните дела, е таканаречениот лудизам – специфичен одговор на „тешките“ теми покренати од повоената генерација. Тоа е виор на жива еротика, младост и невоздржана, никогаш незаситена страст. Меѓутоа, меѓу редови може да се насетат и празнината, суетата и егоизмот на општеството кое постојано брка задоволство. Денес, половина век по 68-ма, суетата и бесцелноста остануваат актуелни, на кои им се придружува потрагата по пари и егзистенцијалниот страв“.
Во биографијата на еден од најпрогресивните уметници во поранешната држава Душан Јовановиќ (1939-2020) пишува дека повеќе од пет децении придонесувал за словенечкиот и поширокиот регионален театар како драматургот, режисер и есеист. Режирал повеќе од една третина од првите изведби на сопствени текстови, како и многу други текстови, вкупно повеќе од деведесет. Добитник е на бројни награди за својата работа.
Иван Пеновиќ (1992) е млад хрватски драматург, драматург и режисер, кој со својот интегрален и ангажиран пристап веќе се рангира меѓу највозбудливите автори во регионот.
Претставата ќе биде посветена на петгодишнината од смртта на Душан Јовановиќ и ќе има повеќе регионални премиери и изведби. Првата премиера е планирана да се игра во месец август во Будва на фестивалот „Будва Град театар“, Црна Гора, втората ќе биде на „Охридско лето“, па следува изведбата на Бриони во Хрватска. Наредната изведба во Македонија ќе биде за време на одржувањето на театарскиот фестивал РУТА, во октомври во Драмски, и понатаму претставата ќе се игра на секои два месеца во рамките на изданијата на РУТА во сите регионални театри членки на Унијата.
