Требаше да биде рутински самит меѓу Европската Унија и Латинска Америка. Главните теми на самитот, одржан во колумбискиот град Санта Марта, беа зајакнување на енергетската соработка, борба против климатските промени и меѓународната безбедност. Сепак, самитот беше обележан со барања од клучните латиноамерикански земји ЕУ да ги осуди империјалистичките намери на САД кон Венецуела.
Најгласниот критичар на американскиот империјализам беше домаќинот на самитот, левичарскиот колумбиски претседател Густаво Петро, кој во својот воведен говор истакна дека нападите на САД врз бродови во Карибите веќе одзедоа повеќе од 60 животи. Вашингтон тврди дека напаѓа бродови за дрога и дека убиените луѓе биле дилери на дрога, додека Петро ги нарекува овие убиства „вонсудски егзекуции“ на рибари и цивили.
Во овој контекст, Петро во својот говор предупреди за лицемерието на светот што зборува за мир, а во исто време спроведува воени операции што убиваат цивили. „Што правиме на овој самит во денешниот свет среде ракети?“, ги праша Петро присутните политичари од ЕУ, додавајќи дека сака самитот да биде „светилник во средината на варварството“.
Петро беше уште пожесток во својот говор на јавниот собир во Санта Марта пред почетокот на самитот, кога го обвини американскиот претседател Доналд Трамп дека користи воена закана кон Венецуела за да го одвлече вниманието од истрагата за неговиот покоен пријател Џефри Епштајн, кој е обвинет за сексуално злоставување деца, во која наводно учествувале јавни личности од врвот на американското општество.
Колумбискиот претседател му рече на Трамп дека Латинска Америка „нема да молчи“ додека Вашингтон ги проширува своите операции против наводните „трговци со дрога“ на Карибите. Напротив, како што рече Петро, луѓето од Латинска Америка „ќе се издигнат во милиони“.
„Ако белоглавиот орел нападне кондор, јагуарот ќе се разбуди. Тоа будење ќе биде со сила на ураган“, го предупреди Петро американскиот претседател.
