Германија: Признавање на Палестина само кога ќе се договори решение за две држави

Германскиот министер за надворешни работи Јохан Вадефул денес потврди дека германската влада сè уште поддржува решение за израелско-палестинскиот конфликт со две држави и нагласи дека за Германија „признавањето на палестинска држава доаѓа само на крајот од процесот“.

Вадефул потсети дека процесот мора да се постигне преку преговори и дека не треба да се води никаква политика што би можела да создаде пречки во таа насока.

„Патот на договор, компромис и преговори останува тежок, но Германија го поддржува“, рече Вадефул, според „Дер Шпигел“.

Тој нагласи дека, две години по нападот на Хамас врз Израел на 7 октомври 2023 година, сè уште нема излез од конфликтот.

„На регионот сега му е потребен итен прекин на огнот, значително поголема хуманитарна помош за луѓето од Газа и итно, безусловно ослободување на заложниците“, рече германскиот министер за надворешни работи.

Тој повторно ја осуди сегашната израелска офанзива во Газа, нарекувајќи ја „целосно погрешен пат“. Вадефул предупреди дека секој обид за нелегално анектирање на окупираните територии дополнително ги поткопува шансите за трајно решение на конфликтот.

„Договорено решение засновано на моделот на две држави е патот што може да им овозможи на Израелците и Палестинците да живеат во мир, безбедност и достоинство“, нагласи тој.

Вејдефул денес ќе учествува на меѓународна конференција во ОН во Њујорк, организирана од Франција и Саудиска Арабија, со цел зајакнување на решението за две држави меѓу Израел и Палестинците.