Селекторот на турската кошаркарска репрезентација, Ергин Атаман, е познат по својот „долг јазик“, па овој пат им се „закачи“ на Американците. Во интервју за австралиската веб-страница „Баскетбол“, Атаман рече дека американските клубови треба да престанат да се прогласуваат за „светски шампиони“ затоа што ја освоиле НБА-лигата, додавајќи дека ако ја сакаат таа титула – треба да ги мерат силите со клубовите од Евролигата, за кои вели дека се блиску до нив по квалитет.
- Кога НБА-тимовите ја освојуваат титулата во НБА-лигата, тие веднаш се прогласуваат за светски шампиони. Бев вознемирен поради тоа бидејќи таа сезона бевме шампиони на Евролигата, па ги предизвикав, се присети Атаман и додаде: – Ако сакате да бидете светски шампион, тогаш мора да го победите шампионот на Евролигата. Можеби мора да го победите и австралискиот шампион. Значи, за мене тоа е секојпат предизвик и повторно реков, со големо почитување кон НБА-тимовите, секако, кошарката во Евролигата е на многу високо ниво и за да биде некој наречен светски шампион, мора да игра против нас, порача тренерот на Панатинаикос, кој верува дека тоа ќе се случи во најскора иднина.
Атаман истакнува дека НБА-клубовите се малку поквалитетни од евролигашите.
- Им кажав на луѓето вакви работи и претходно, ако им одземете една суперѕвезда на тие НБА-тимови, верувам дека многу екипи од Евролигата би можеле да ги победат, и се осврна на претходните дуели меѓу клубови од САД и Европа:
- Слушајте, верувам дека пред две или три години, во претсезоната, имаше многу натпревари меѓу екипите од Евролигата и НБА. Ако не се лажам, во 70 или 80 проценти од тие натпревари, екипите од Евролигата победија. Со сето должно почитување кон НБА, тие имаат многу ѕвезди, навистина големи играчи, како Леброн, Кевин Дурант, Стеф Кари и повеќето од тие тимови, но ако одземете само еден од нив, тимовите од Евролига би победиле, заврши Турчинот.
