Со почеток во 20:30 часот на малата сцена на Македонскиот народен театар во рамки на фестивалот „Скопско лето“ премиерно ќе биде изиграна театарската претстава „Лов на дива свиња“ – македонско-црногорски проект што тематизира семејно насилство. Авторка на текстот е црногорската писателка Марија Сарап, а режисер е Наташа Поплавска.
Претставата е во копродукција на Македонскиот народен театар, Градското позориште од Подгорица и Здружението за развивање на уметност и културна соработка „Арт Медиа“ од Скопје.
Во претставата играат актери од двете земји: нашите Искра Ветерова-Славенска, Ана Стојановска и Мина Јелушиќ-Јериниќ и гостите од Црна Гора – Ѓоргије Татиќ и Вукан Пејовиќ.
Драмата „Лов на дива свиња“ на црногорската авторка Марија Сарап претставува силен уметнички израз за искуството на жената на Балканот – жена која е маргинализирана, исклучена и протерана затоа што не се вклопува во очекуваните општествени модели на сопруга и мајка. Преку интимната приказна за мајка на која ѝ е ускратено правото на дете, авторката ги отвора универзалните прашања за правото на глас, автономијата и идентитетот на жената во современото патријархално општество. Оваа драма е важна, бидејќи ѝ дава глас на жената избришана од наративот. Нејзината вредност не е само уметничка – таа е и општествена и политичка интервенција.
По потпишувањето на меморандумот за соработка, претставата ќе се реализира во копродукција помеѓу Македонскиот народен театар, Градското позориште од Подгорица и Здружението за развивање на уметност и културна соработка „Арт Медиа“ од Скопје. Премиерната изведба во Подгорица, Црна Гора, е планирана за септември. Претставата е дел од Националната програма за култура за 2025 година и финансиски е поддржана од Министерството за култура и туризам на Република Северна Македонија и од Градот Подгорица, Црна Гора, како и од компаниите: „Виталиа“ од Скопје, хотелот „Мериот“ и рестораните „Дистрикт“, „Тренд“ и „Шпајз“.
На прес-конференција по повод премиерата, Сарап кажа дека се работи за приказна за „демоните што ги ловиме цел живот во себе и се обидуваме да ги избркаме од себе за да бидеме подобри луѓе“.
Режисерката Поплавска додаде дека се работи за „женска тема со јасна порака, приказна за семејно насилство и семејни тајни, демони што се пренесуваат во фамилијата“.
-Женски крик за сите жени кои доживеале барем малку од она што ќе се види на сцената, за жени кои молчеле и се прашувале дали да кажат и кому да се обратат. Ова е апел и до институциите. Мисијата сме ја постигнале ако барем некој во публиката се реши да си каже: Доста е!, рече Поплавска.
По праизведбата во МНТ, „Лов на дива свиња“ ќе има премиера и во Градско позориште Подгорица планирана за септември.
