Собранието, утре, во рамките на 54. Седница, треба да го разгледа владиниот предлог Азир Алиу да биде министер за здравство. На седницата, според дневниот ред, е и предлогот за именување на Албрим Хоџа за заменик-министер за земјоделство, шумарство и водостопанство.
Предлог-текстот за Алиу доставен од Владата е потпишан лично од премиерот Христијан Мицкоски. Според биографијата на кандидатот, Алиу е дипломиран електроинженер и доктор по информатички науки, кој моментно ја извршува функцијата редовен професор на Факултетот за компјутерски науки и технологии при Универзитетот на ЈИЕ во Тетово. Тој беше министер за информатичко општество и администрација во 2023 и 2024 година и, согласно со доставената биографија, бил и на други високи и одговорни позиции.
Премиерот Мицкоски, минатата недела, во изјава за медиумите, рече дека очекува добра соработка со Алиу во рамките на Владата. Првиот вицепремиер и министер за животна средина и просторно планирање, Изет Меџити, смета дека Алиу е најдобар предлог за министер за здравство. Според Меџити, министерот треба да биде добар менаџер, кој го познава системот и кој може да придонесе за подобрување на ресорот.
Алиу е дел од Алијанса за Албанците, која останува во „Вреди“ по оставката на Арбен Таравари од 15 мај годинава и одлуката да замине во опозиција.
И предлогот за Хоџа да биде заменик-министер за земјоделство, шумарство и водостопанство е потпишан од премиерот Мицкоски. Во биографијата на кандидатот се наведува дека тој е новинар со повеќегодишно работно искуство и дека го стекнал своето образование на Правниот факултет при Државниот универзитет во Тетово.
