Прашање е патот до Унгарија: По која рута Путин ќе допатува во Будимпешта?

Кремљ излезе со соопштение по синоќешниот телефонски разговор меѓу рускиот претседател Владимир Путин и американскиот претседател Доналд Трамп, потврдувајќи дека подготовките за нивниот нов состанок во наредните недели продолжуваат со забрзано темпо.

Во соопштението се наведува дека „постои согласност дека ништо не треба да се одложува“ и дека двајцата лидери би можеле да се сретнат во следните две недели или нешто подоцна – во Будимпешта.

Исто така, се додава дека сè уште има голем број прашања што американскиот државен секретар Марко Рубио и рускиот министер за надворешни работи Сергеј Лавров мора да ги решат пред да се сретнат двајцата претседатели. Кремљ наведува дека составот на преговарачките делегации сè уште се договара.

Интересно е што Кремљ објави дека „сè уште не е јасно која рута ќе ја избере рускиот претседател за да патува до Унгарија“, истакнувајќи дека земјата „има посебен статус кога станува збор за суверенитетот и заштитата на сопствените интереси“.

Унгарија е опкружена со членки на НАТО – Романија, Хрватска, Словенија и Словачка – а исто така се граничи со Србија, Австрија и западна Украина. Сите овие земји, освен Унгарија, се потписнички на Римскиот статут на Меѓународниот кривичен суд (МКС), кој издаде налог за апсење на Владимир Путин во 2023 година.

Сепак, Унгарија не е членка на МКС, што му овозможува на Путин да патува таму без ризик од апсење. Проблемот, сепак, е маршрутата – бидејќи земјите-членки на ЕУ и НАТО генерално не дозволуваат прелети на авиони што превезуваат луѓе под меѓународни налози за апсење.

Затоа, индиректните летови преку Србија или Турција се споменуваат како можни алтернативи, што би му овозможило на Путин да стигне до Будимпешта без директно да ја премине територијата на земјите-членки на НАТО.