Шумски пожари беснеат во Грција од Ахаја до Закинтос. Села, болници и манастири се евакуирани додека пожарникарите и волонтерите се борат со огнената стихија. Наредени се итни евакуации во бројни села, а некои болници се евакуирани за да се избегне трагедија. Најкритичните области се регионите Превеза, Хиос и Закинтос.
Во околината на Патра прогласена е евакуацијуа на уште четири зони, каде што противпожарните екипи се борат со повеќе истовремени пожарни фронтови. Детската болница „Караманданио“, која е специјализирана за педијатриска нега, беше евакуирана како мерка на претпазливост додека се приближуваа пламените јазици. Пожарникарите се на терен обидувајќи се да спречат ширење на пожарот во густо населените области на градот. Локалните власти ги повикуваат граѓаните да бидат исклучително внимателни и строго да ги следат упатствата на службите за итни случаи.
Евакуации се спроведени во голем број заедници, вклучувајќи ги Старата и Новата Филипијада во Превеза, додека на Закинтос, жителите на четири области беа принудени да ги напуштат своите домови. Преку системот 112 се издадени предупредувања, со јасни наредби за итна евакуација.
Пожарникарите работат деноноќно, но нивната работа е дополнително отежната од силните ветрови и екстремните температури. Густиот чад и портокаловата светлина на хоризонтот јасно го одразуваат обемот на катастрофата.
Во Патра, пожарот го зафати и манастирот „Агиос Николаос“, каде што се запали покривот. Пожарникарите, заедно со калуѓерки и волонтери, вложуваат натчовечки напори за да спречат уништување на манастирот. Во исто време, пожарот се заканува и на самата Патра, поради што дел од населението веќе е евакуиран.
Пожари повторно избувнаа и во населбата Гори, како и во прифатниот центар за мигранти Филипијада. Министерот за имиграција и азил, Танос Плеврис, потврди дека центарот бил евакуиран во вторник вечерта, додека пожарникарите се борат да ги спасат зградите денес. Ситуацијата во Филипијада и повеќето села во општина Зирос останува многу сериозна.
И покрај воздушната поддршка, пожарот повторно се разгоре и зафати дел од населбата. Локалните жители и волонтери работат заедно со пожарникарите за да ги изгаснат пламените јазици, а многу домови беа спасени од уништување дури во последен момент. Сушата и екстремните температури дополнително го поттикнуваат ширењето на пожарите, додека човечките фактори – без разлика дали се работи за невнимание или намерно палење – често се причина за нивното избувнување.
Катастрофалните последици од овие пожари вклучуваат уништување на домовите, губење на природните живеалишта и директна закана за човечките животи. Грција се соочува со сè поголеми предизвици во борбата против климатските промени, чии разорни ефекти сега се повеќе од очигледни.
