Повеќе пари, повеќе кредити – силен финиш на економијата во 2025

Паричната маса во декември забележа месечен раст од 4,9 %, како резултат на зголемувањето на депозитните пари, краткорочните депозити и готовите пари во оптек, иако долгорочните депозити со рочност до две години бележат пад. На годишна основа, паричната маса е повисока за 10,4 %, при што растот, главно, произлегува од зголемените депозитни пари и од краткорочните депозити.

Вкупните депозити во декември биле зголемени за 4,4 % на месечно ниво, со поизразен придонес од секторот домаќинства, додека раст е забележан и кај корпоративниот сектор. На годишно ниво, депозитите бележат раст од 10,1 %, најмногу поради зголеменото штедење кај домаќинствата.

Кредитната активност, исто така, бележи позитивно движење. Вкупните кредити во декември биле зголемени за 3,0 % на месечна основа, при што растот е поизразен кај корпоративниот сектор. На годишно ниво, кредитите се повисоки за 13,0 %, како резултат на зголеменото кредитирање и кај компаниите и кај домаќинствата.

Депозитите на корпоративниот сектор во декември пораснале за 6,0 % на месечно ниво, главно, поради зголемувањето на краткорочните депозити во странска валута и депозитните пари. Во споредба со тој месец лани, корпоративните депозити се повисоки за 6,5 %.

Кредитите на корпоративниот сектор забележале месечен раст од 5,1 %, најмногу поради зголеменото кредитирање во денари. На годишна основа, растот изнесува 15,3 %, при што целосно произлегува од денарските кредити.

Кај домаќинствата, вкупните депозити во декември биле зголемени за 3,6 % на месечно ниво, главно, како резултат на растот на депозитните пари. На годишна основа, депозитите на домаќинствата бележат раст од 12,1 %.

Кредитите на домаќинствата, исто така, бележат позитивни трендови, со месечен раст од 0,9 % и со годишен раст од 10,9 %. Потрошувачките и станбените кредити остануваат најзастапени, при што во декември забележале месечен раст од 1,4 % и 1,7 %, соодветно, а на годишна основа – раст од 10,6 % и 15,8 %. Автомобилските кредити на месечно ниво се намалени за 2,1 %, додека на годишно ниво бележат умерен раст од 1,3 %.

Во декември било евидентирано и намалување на задолжувањето преку кредитни картички, како и на негативните салда на тековните сметки, што укажува на одредено подобрување на финансиската дисциплина кај населението.

Податоците укажуваат на засилена финансиска активност и на стабилен раст на депозитите и на кредитите, што претставува позитивен сигнал за економското движење на крајот од 2025 година.