Повеќе од 60 нови вируси откриени во Русија: Дали ќе се развие сој со пандемиски својства?

Повеќе од 60 претходно непознати вируси се откриени во Русија додека се работи на спречување на глобални пандемии, изјави денес генералниот директор на Рускиот центар за биотехнолошки истражувања, Александар Агафонов.

„Сакаме да ги откриеме сите вируси што циркулираат во Руската Федерација. Клучот за нас е да ги пронајдеме не само сите вируси што постојат, туку и оние што се особено патогени за луѓето. Повеќе од 50 федерални субјекти ни ги испратија своите примероци. Веќе изолиравме повеќе од 60 нови вируси и ја проучивме нивната генетска структура“, рече Агафонов, а јави Интерфакс.

Тој истакна дека експертите избрале неколку вируси за да ги проучат нивните биолошки својства.

„Нашата главна задача сега е да утврдиме колку брзо ќе еволуираат овие вируси, во што ќе се развијат и дали на крајот ќе се развие сој со пандемиски својства. Ова е многу сложена задача“, рече Агафонов.

Тој истакна дека тестирањето на прототипови и производството на лекови би можеле да започнат наскоро потоа.

Тој повика на употреба на вештачка интелигенција и невронски мрежи за предвидување на структурите на нови лекови и вакцини.