Сладоледот е првото нешто што посегнуваме кога сакаме ем да се разладиме, ем да се заблажиме. Заборавете на гризењето на совеста, и уживајте во здравите одлуки за вашата добросостојба. Пригответе сами домашен сладолед со состојки кои му годат на вашиот организам и на вашето непце. Едноставен десерт што децата ќе го обожаваат. Освежителен, вкусен, и што е најважно здрав!
Состојки:
3 големи, зрели банани
1 чаша јагоди (околу 150 г), свежи или замрзнати
1/2 чаша (околу 130 г) полномасен грчки јогурт
1-2 лажици мед или јаворов сируп
1/2 лажичка екстракт од ванила
Подготовка:
Првиот и најважен чекор е подготовката на бананите. Излупете ги, исечете ги на парчиња со дебелина од околу два сантиметри, наредете ги на плех обложен со хартија за печење и ставете ги во замрзнувач најмалку два часа, идеално преку ноќ, пишува Bigger Bolder Baking.
Добро замрзнатите банани се клучни за постигнување на вистинската текстура.
Кога ќе бидете подготвени за подготовка, прво ставете го грчкиот јогурт, медот и екстрактот од ванила во блендер, објавува Net.hr.
Додавањето течни состојки на дното му помага на блендерот полесно да ги движи сечилата. Потоа додадете ги замрзнатите парчиња банана и јагодите.
Мешајте на голема брзина додека смесата не стане целосно мазна и кремаста. Можеби ќе треба неколку пати да го запрете блендерот и да користите шпатула за да ја турнете смесата кон сечилата.
Бидете трпеливи, бидејќи овој процес може да трае една или две минути. Сладоледот е готов кога нема парчиња овошје и смесата е густа и мазна.
Сервирајте веднаш, додека е сè уште мек и кремаст. Можете да декорирате со свежо овошје, парчиња темно чоколадо или шарени трошки.
