Потребна ни е инфраструктура отпорна на климатски шокови

Изградбата на одржлива инфраструктура треба да биде неопходност, а не избор. Првиот вицепремиер и министер за животна средина, Изет Меџити, на конференцијата на тема „Унапредување на зелената инфраструктура на Западен Балкан“ истакна дека зелената инфраструктура е глобален предизвик што бара колективна акција, визија и соработка.

– Начинот на кој ги обликуваме нашите инфраструктурни проекти директно влијае врз квалитетот на животот, економската стабилност, заштитата на животната средина и врз отпорноста на нашите заедници на климатските промени. Стратешките инвестиции во инфраструктура, која ги зема предвид климатските ризици и аспектите на биолошката разновидност, претставуваат моќна алатка за забрзување на економскиот развој, создавање нови зелени работни места, поттикнување иновации и исполнување на целите за одржлив развој до 2030 година – изјави Меџити.

Тој ја истакна важноста на интегрирањето на климатските и на еколошките аспекти во процесот на планирање и проценка на влијанието врз животната средина, додавајќи дека овозможува носење информирани и долгорочно одржливи одлуки.

– Инфраструктурата што е отпорна на климатски шокови, не само што ги заштитува буџетот и јавните ресурси туку и придонесува за стабилност и сигурност за идните генерации, а чекорите што треба да се преземаат се градење и адаптација на системите за управување со ризици што ќе нè подготват за климатските предизвици, трансформација на енергетскиот сектор кон обновливи извори, модернизација на земјоделството преку ефикасни системи за наводнување и климатски паметни практики и унапредување на енергетската ефикасност и на сеизмичката отпорност на објектите – рече Меџити.  

На конференцијата присуствуваше и министерката за енергетика, рударство и минерални суровини, Сања Божиновска.