Постигнат е „значаен напредок“: Украинско-руските преговори продолжуваат денес во Женева

Специјалниот претставник на американскиот претседател, Стив Викоф, изјави дека вчера во Женева е постигнат „значаен напредок“ во преговорите меѓу Украина и Русија, посредувани од САД, за завршување на војната и дека тие разговори продолжуваат и денес.

„Успехот на претседателот (САД) Доналд Трамп во зближувањето на двете завојувани страни донесе значителен напредок и ние сме горди што работиме под негово водство за да ги спречиме убиствата во овој ужасен конфликт. Двете страни се согласија да ги информираат своите лидери и да продолжат да работат на постигнување договор“, напиша Викоф на мрежата X.

Разговорите, кои започнаа вчера во Женева, се трета рунда трилатерални преговори.

Сепак, има мала надеж дека ќе се постигне пробив во преговорите, бидејќи Кремљ не попушти пред своите максималистички барања за украинска територија, пишува Би-Би-Си.

Во изјава за мрежата X синоќа, главниот преговарач на Украина, Рустем Умеров, рече дека првиот ден од преговорите бил фокусиран „на практични прашања и механиката на можно решение“.

Советникот на претседателот на Украина, Серхи Лешченко, потврди за Укринформ дека европски советници за безбедност биле присутни, но не биле директно во преговарачката сала. Тој нагласи дека советници од Франција, Германија, Италија и Велика Британија биле во постојана комуникација со учесниците и дека нивното присуство ја штити украинската и европската перспектива: „Европа мора да биде на преговарачката маса, а патот на Украина кон ЕУ е неизбежен и корисен за двете страни.“

Американскиот претседател Доналд Трамп претходно изјави дека Украина треба „што побрзо да седне на преговарачката маса“.

Новата рунда преговори меѓу Русија, САД и Украина се одржа во хотелот „Интерконтинентал Женева“. Руската делегација ја предводеше помошникот на претседателот Владимир Путин, Владимир Медински, американската делегација ја предводеа специјалниот пратеник Стивен Виткоф и советникот на Белата куќа Џаред Кушнер, а украинската делегација ја предводеше шефот на кабинетот на Володимир Зеленски, Кирил Буданов.

Паралелно, во Женева ќе се одржат состаноци на работната група за економски прашања, на кои ќе учествува и генералниот директор на Руски фонд за директни инвестиции (РДИФ), Кирил Дмитриев.