Поставени фотоволтаици во сите 10 основни училишта

Во сите 10 основни училишта во општина Карпош веќе се поставени фотоволтаични панели – проект кој ја позиционира општината како лидер во зелена енергија и одржлив развој.

– Ова не е шминка, туку вистинска работа, визија и енергија што носи резултати – вели градоначалникот на Општина Карпош, Стевчо Јакимовски.

Тој додава дека со оваа инвестиција, училиштата веќе ги намалиле своите сметки за електрична енергија, а следниот чекор, како што нагласува, е уште поамбициозен – да станат производители и продавачи на електрична енергија.

– Нашата цел е едноставна – училиштата да произведуваат повеќе струја отколку што трошат, да ја враќаат назад во системот и да станат мали енергетски центри со голема општествена улога – изјави Јакимовски.

На тој начин, според него, Карпош ќе биде првата општина во Македонија што целосно ќе функционира на принципи на енергетска ефикасност и зелена трансформација.

– Учениците ќе учат од жив пример дека иднината е зелена, а училиштата ќе се претворат во вистински симбол на одговорност и иновација. Додека некои велат дека ќе поставуваат панели, ние веќе ги имаме. И не само тоа – сега ги надградуваме и ги претвораме во генератори на енергија – рече Јакимовски.