После 20 години полицијата во САД откри сериски убиец „Спасувал луѓе преку ден“

По речиси 20 години, полицијата во американската држава Висконсин верува дека конечно ја решила мистеријата за исчезнувањето и убиството на 21-годишната самохрана мајка Дејдре Харм. Властите го именуваа Кристофер Ревак, поранешен болничар кој изврши самоубиство во 2009 година и е поврзан со најмалку две други исчезнати жени, како одговорно лице, објави „Унилад“.

Дејдре Харм исчезна на 10 јуни 2006 година, откако излегла од бар во Висконсин Рапидс. Пет месеци подоцна, ловци ги пронајдоа нејзините останки во блиската шумска област. Оваа недела, канцеларијата на шерифот на округот Вуд објави дека истрагата за нејзината смрт е официјално затворена.

Окружниот обвинител Џонатан Е. Барнет, во писмо до шерифот Шон Бекер, рече дека би поднел обвинение против Кристофер Е. Ревак доколку тој е сè уште жив. „Го сметам овој случај за затворен. Верувам дека би имал доволно докази за да поднесам обвинение и, доколку Ревак е сè уште жив, да го добијам судењето“, додаде тој.

Ревак, кој си го одзеде животот во затвор во Мисури во 2009 година, беше обвинет за убиство на друга жена, 36-годишната мајка на три деца Рене Вилијамс. Таа исчезна во 2007 година откако ја заврши смената во бар каде што Ревак наводно бил виден таа вечер, но нејзиното тело никогаш не било пронајдено.

Шерифот на Мисури, Крис Дегасе, кој го истражуваше случајот на Вилијамс, го потврди сомневањето за „Фокс њуз диџитал“. „Кога почнав да работам на Кристофер Ревак, тој беше мој осомничен за убиството на Рене Вилијамс и не мислев дека му е прв пат“, рече тој.

Името на Ревак се појави и во истрагата за исчезнувањето на водителката на вести Џоди Хајзентруит во Мејсон Сити, Ајова, во 1995 година. Таа исчезна на пат кон работа, оставајќи ги само своите чевли со високи потпетици и свиткан клуч од автомобилот. Иако беше законски прогласена за мртва во 2001 година, нејзиното тело никогаш не беше пронајдено, а полицијата во тоа време немаше докази што ја поврзуваат Ревак со случајот.

Информациите што го поврзуваат Ревак со убиството на Деидре Харм фрлаат нова, вознемирувачка светлина врз сите случаи. „Се чини дека се работи за сериски убиец“, рече шерифот Дегасе. „Во текот на денот, како болничар, тој им помагаше на луѓето и ги спасуваше, но Крис Ревак имаше и темна страна“, додаде тој.

За семејството на Џоди Хајзентруит, потрагата по вистината сè уште не е завршена. „Вистинскиот мир ќе дојде само кога Џоди ќе биде пронајдена и правдата ќе биде задоволена“, рекоа тие. Сè уште се нуди награда од 50.000 долари за информации што би можеле да доведат до решение за нејзиното исчезнување.