Белгиските покраини Фландрија и Валонија постигнаа договор за воведување патарини на автопатите, објавува „Хет Лаатсте Ниус“. Фламанскиот министер за финансии Бен Вајтс изјави дека покраината сака да инвестира многу во патната инфраструктура, што значи дека им се потребни средства за изградба на нови патишта и одржување на постојните. Министерот не можеше да потврди кога ќе се воведе вињетата.
„Не можам и нема да бидам врзан за временска рамка, но мојата амбиција е да се постигне договор меѓу владите на Валонија и Фландрија во наредните месеци“, рече тој.
Патарините би генерирале 130 милиони евра годишно само за Фландрија, а најмалку 50 милиони евра за Валонија. Овие две покраини се одлучија за вињета наместо наплата по километар. Таквата наплата се смета за технички посложена и политички чувствителна. Наплатата на патарина би се однесувала на главните автопати и регионални патишта, слично како во Австрија и Швајцарија. Се споменува цената од 100 евра годишно. За автомобили постари од дваесет години, патарината за 365 дена би можела да се зголеми на 125 евра.
Најверојатно, вињетата ќе биде дигитална. Системот ќе биде поврзан со регистарската табличка и ќе се следи со камери покрај патот. Секој што нема важечка вињета ризикува казна. Странските возачи ќе мора да купат вињета преку интернет, а се споменуваат неделни и месечни вињети. Во моментов, патарина во Белгија плаќаат само камионите, а главната причина за воведување патарини е густиот транзитен сообраќај низ земјата.
