Посетителите ќе може да ги откријат македонските рурални домаќинства преку нивните приказни

Саемот за туризам, во чиј фокус ќе бидат македонските рурални домаќинства и бизниси, ќе се одржи на 31 јануари и 1 февруари, во Скопје. Како што најавуваат организаторите, саемот на едно место ќе ги обедини најавтентичните рурални приказни од цела Македонија, а целта е да се приближи руралниот и искуствениот туризам до пошироката јавност, но и да се покаже дека патувањето не е само дестинација туку и доживување, поврзување и учество во секојдневието на селскиот живот.

На саемот ќе се претстават мали рурални домаќинства со капацитет до 20-ина легла, автентични семејни винарници со можност за групни и за индивидуални дегустации, ресторански услуги и сместување, како и земјоделски и рурални бизниси, кои нудат мир, природна убавина и топло селско гостопримство.

Предвидена е богата програма наменета за домашните и за странските посетители, за туристичките професионалци, за семејствата и за сите љубители на автентичното рурално доживување.

– Посетителите ќе може да се информираат за можностите за краток и за подолг престој и да откријат вистинско рурално доживување: месење пита, печење леб на традиционален македонски начин, адреналински активности во природа, часови по традиционално готвење, берење јаболка и друго автентично искуство, наменето за сите генерации. За љубителите на природата, добрата храна и врвните вина, искуствениот туризам е многу подобра алтернатива од масовниот туризам, кој најчесто нуди брзи и површни посети.  Искуствениот туризам создава подлабока, поискрена и подолготрајна релација меѓу посетителот и местото. Преку сеопфатната програма што ја нудат овие домаќинства, секој посетител заминува многу побогат со нови знаења, доживувања и емоционална исполнетост. Искуствениот туризам им овозможува на туристите да станат дел од секојдневието на локалната заедница: да учествуваат во подготовката на традиционална храна, да научат занает, да слушнат лични приказни и да доживеат култура што не може да се најде во туристичките брошури или во големите хотелски комплекси, каде што посетителот е само бројка. Ваквиот пристап носи повеќекратни придобивки: поквалитетно туристичко искуство, поддршка на локалната економија, зачувување на културното наследство и помал притисок врз природните ресурси, создавајќи одржлив модел на туризам што им користи и на гостите и на домаќините – велат организаторите.

Во текот на саемот, сите посетители ќе добијат ваучер со 15 отсто попуст и на производите и на услугите што ги нудат руралните домаќинства. Покрај попустите, посетителите ќе имаат можност да дегустираат органски производи, вина, ракии, традиционални специјалитети и домашни преработки од разни региони на Македонија, директно од луѓето што ги одгледуваат, произведуваат и создаваат.

– Секој производ носи своја приказна, регионален идентитет и знаење пренесувано на генерациите. Овој саем е дел од пошироката визија за одржлив и креативен туризам, развој на туризмот по должина на трасата Е-75, развој на руралните средини и акцентирање дека посетителот во Македонија не е само гостин туку и активен учесник – некој што останува подолго, учи, вкусува и се поврзува со местото и со луѓето – наведуваат организаторите.

Саемската програма е збогатена со музички и со стендап-перформанси, како и со детски катчиња.

Во рамките на саемот ќе бидат достапни детални информации за организираните активности во руралните домаќинства, настаните во природа за групи и за поединци, за гастрономските и за винските пакети, за оригиналните работилници за деца и за возрасни.

Саемот за туризам – домаќинства во руралните средини е организиран од „Јавна соба“ – Скопје, Министерството за култура и туризам, Земјоделскиот институт – Скопје, Амбасадата на Република Словенија и швајцарската програма за зголемување на пазарната вработливост – ИМЕ.