Порака по завршувањето на состанокот Трамп – Зеленски: Блиску сме, не делат само едно-две многу чувствитени прашања до постигнување договор за крај на војната

Американскиот претседател Доналд Трамп на почетокот од состанокот со украинскиот претседател Володимир Зеленски во Флорида изјави дека верува оти разговорите за завршување на војната на Русија во Украина се во „завршна фаза“. Коментарите на Трамп следеа по претходниот телефонски разговор со рускиот претседател Владимир Путин, за кого Трамп рече дека е „многу сериозен“ во врска со завршувањето на војната.

„Ќе му се јавам и на претседателот Путин по средбата со Зеленски и ќе ги продолжиме преговорите“, рече Трамп. Трамп претходно изјави дека имал „многу продуктивен“ телефонски разговор со Путин. „Тукушто имав добар и многу продуктивен телефонски разговор со рускиот претседател (Владимир) Путин“, напиша Трамп на својата платформа Truth Social, без да открие детали од разговорот.

„Мислам дека се справуваме многу добро. Блиску сме, имаме едно или две многу чувствителни, многу тешки прашања. Но, мислам дека правиме многу добар напредок. Денес направивме голем напредок, но веќе еден месец правиме напредок. Ова не е договор што е постигнат за еден ден. Ова се многу сложени прашања“, рече Трамп по завршувањето на состанокот со Зеленски, објави „Би-би-си“.

„Прашањето за територијата е клучно, ќе разговараме за тоа во наредните месеци. Украинците треба да постигнат договор, време е војната да заврши, и Русија и Украина го сакаат тоа“, рече Трамп.

За Донбас: „Можеме да свикаме референдум за ова прашање“

„Разговаравме за план од 20 точки. Нашите тимови работеа на планот еден месец. Прашањето за Донбас е многу тешко. Нашата позиција е јасна и ова е многу тешко прашање. Имаме различни ставови за ова со Русите“, рече Зеленски, додавајќи дека може да се свика и референдум за ова прашање.

„Веројатно ќе мора да го спроведеме планот преку референдум. 91% од Украинците сакаат војната да заврши“, рече Трамп.

Трамп: Се согласивме за 95% од планот

„Се согласивме за 95% од планот“, рече Трамп.

Зеленски: Се согласивме за планот од 20 точки

„Ви благодарам, претседателе. Имавме одличен разговор, им благодарам на Виткоф и Кушнер за нивната посветеност. Разговаравме за сите аспекти на планот од 20 точки. Се согласивме за многу точки речиси целосно. Безбедносните гаранции се клучни, се согласивме за нив 100%. Се согласивме дека нашите тимови ќе се состанат во наредните недели за да го финализираат овој план.

Украина е подготвена за мир. Ви благодарам, претседателе“, рече Зеленски.

Трамп: Направивме голем чекор кон завршување на војната

„Имавме одличен состанок, Путин и јас. Зеленски и јас разговаравме со претставници на Франција, Полска, Италија, Норвешка, Велика Британија, Германија, шефот на НАТО и Урсула фон дер Лајен. Имавме одличен разговор. Нашиот состанок беше одличен, опфативме 95% од темите и постигнавме голем напредок кон завршување на војната“, рече Трамп.

„Разговаравме за секоја тема, а со Путин претходно разговорите беа многу детални. Се надевам дека уживавте во храната, вашите луѓе уживаа во храната“, рече тој.