Порака на атентаторот – што пишува на куршумот со кој е убиен Чарли Кирк?

Истражителите пронајдоа муниција врежана со фрази поврзани со трансродовата и антифашистичката идеологија во пушката за која властите веруваат дека е употребена во убиството на Чарли Кирк, објавија американските медиуми.

Истражителите не сакаа да коментираат за оваа информација, а подоцна се покажа дека натписите на пушката и муницијата биле погрешно протолкувани.

Чарли Кирк наводно бил убиен со постар модел на ловџиска пушка, која била пронајдена во шумата во близина на местото на пукањето во среда на Универзитетот во Јута. Пушката наводно била завиткана во крпа со чаура во цевката. Три неиспукани куршуми врежани со натписи поврзани со трансродовата и антифашистичката идеологија биле пронајдени и во пушката, велат првите информации.

Според истражителите, истрелот бил испукан од пушка со долг дострел од покривот на зграда на околу 200 метри од местото на злосторството. Во времето на нападот, Кирк зборувал пред публика од околу 3.000 луѓе, како дел од серија дебати наречени „Докажи ми дека грешам“.

Бирото за алкохол, тутун, огнено оружје и експлозиви на САД не сакаше да коментира за деталите од истрагата за фаталната пукотница во која беше убиен Кирк, наведувајќи дека истрагата е сè уште во тек, објави „Гардијан“.

Кога новинарите го прашаа за гласините дека на запленетата муниција и пушка се пронајдени специфични гравури, агенцијата даде краток одговор.

„ATF не може да коментира за ова бидејќи истрагата е сè уште активна“, рекоа тие.

Висок службеник за спроведување на законот со директно познавање на истрагата предупреди дека извештајот не бил потврден од аналитичарите на ATF, бил неконзистентен со другите резимеа на докази и може да се покаже дека бил погрешно прочитан или погрешно протолкуван.

Во брзите истраги, ваквите извештаи за статусот не се објавуваат јавно бидејќи често содржат мешавина од точни и неточни информации, објави „Тајмс“.