Поради кибер напади, работата на неколку европски аеродроми е нарушена цел викенд

Поради кибер напади на системот за пријава и качување е нарушена работата на неколку големи европски аеродроми, вклучувајќи ги лондонски „Хитроу“, аеродромите во Брисел и  во Берлин, предизвикувајќи доцнења и откажување на летови.

„Колинс Аероспејс“, кој нуди системи за пријава и качување за неколку авиокомпании на повеќе аеродроми во светот, се соочува со технички проблем и предизвика доцнење за патниците при поаѓање, соопшти лондонскиот аеродром „Хитроу“ во саботата, со предупредување за доцнење.

Не е соопштено кој би можел да стои зад кибер нападите.

Од аеродромот во Брисел соопштија дека побарале од авиокомпаниите да откажат половина од закажаните летови во недела, 21 септември, за да избегнат долги редици и доцни откажувања, сигнализирајќи дека прекините ќе продолжат и во текот на викендот, објави „Ројтерс“.

Портпаролот на Европската комисија изјави дека во моментов нема индикации дека инцидентот бил „широко распространет напад“ и дека потеклото на инцидентот сè уште е под истрага.

Ваквите големи прекини обично се резултат или на напади со рансомвер, каде што онлајн уценувачите ги парализираат корпоративните мрежи со надеж дека ќе изнудат пари, или намерна дигитална саботажа.

Нападот ги оневозможи автоматизираните системи, оставајќи само можно рачно пријавување и качување, соопшти аеродромот во Брисел на својата веб-страница.

„Ова има големо влијание врз распоредот на летовите и за жал ќе предизвика доцнења и откажувања. Давателот на услуги активно работи на решавање на проблемот и се обидува да го реши што е можно побрзо.“

Аеродромот соопшти дека досега се откажани десет летови, со просечно доцнење од еден час за сите заминувања.

На патниците со летови закажани за сабота на засегнатите аеродроми им беше советувано да го потврдат своето патување со своите авиокомпании пред да се упатат кон аеродромот.

„Поради технички проблем со давателот на системот што работи низ цела Европа, има подолги чекања при пријавувањето. Работиме на брзо решение“, се вели во пораката на веб-страницата на аеродромот во Берлин.