Една од најголемите нуклеарни централи во Франција беше принудена да се затвори откако огромен рој медузи влегоа во системите за довод на вода што ги ладат реакторите. Инцидентот се случи во нуклеарната централа Гравелин во северна Франција, каде што три реактори беа автоматски исклучени доцна во неделата. Француската државна енергетска компанија EDF потврди дека филтер-бараните на пумпните станици се затнати од она што го нарече „масивен и непредвидлив“ рој медузи, објавува The Guardian.
Ситуацијата ескалираше кога четвртиот реактор, исто така, се исклучи кратко потоа, ставајќи ја целата централа, која снабдува електрична енергија за околу пет милиони домови, надвор од употреба. Другите два реактори веќе беа исклучени поради планирани летни работи за одржување.
Нема еколошки ризик
EDF соопшти дека инцидентот не ја загрозил безбедноста на централата, вработените или животната средина и дека се чини дека немало прекин на извозот на електрична енергија во Обединетото Кралство.
Електраната Гравелин користи вода од канал поврзан со Северното Море за своите системи за ладење. Северното Море е живеалиште на неколку автохтони видови медузи кои често се појавуваат по должината на брегот во текот на летото, кога морето е потопло.
Повторлив проблем
Ова не е прв пат медузите да предизвикаат проблеми за крајбрежните електрани кои користат морска вода за ладење. Слични проблеми ги поттикнаа научниците од Универзитетот во Бристол да развијат „алатка за рано предупредување“ за да го предвидат масовното појавување на роеви медузи.
Нуклеарната централа Торнес во Шкотска, исто така во сопственост на EDF, беше принудена да се затвори една недела во 2021 година од истата причина, една деценија по сличен инцидент во 2011 година.
Роевите медузи претходно ги затворија нуклеарните и термоцентралите во Шведска, САД и Јапонија. На Филипините во 1999 година, тие дури предизвикаа и голем прекин на електричната енергија, за кој некои погрешно веруваа дека е поврзан со вирусот Y2K или со државен удар.
Дури и минатиот септември, неочекуван бран медузи ги преплави системите за ладење на најголемата електрана на јаглен во Кина, принудувајќи ги работниците да се мачат десет дена за да отстранат повеќе од 150 тони од овие морски суштества од централата.
