Полскиот премиер Доналд Туск предупреди дека наредните месеци би можеле да бидат „критични“ во контекст на безбедносните закани од Русија, посочувајќи дека Варшава се подготвува за „различни сценарија“ за можниот развој на ситуацијата.
Туск реагираше на медиумските написи за наводните планови на Москва за вооружена „провокација“ на територијата на Полска, што, според цитираните американски разузнавачки извори, треба да послужи како тест за подготвеноста на НАТО.
„Не сакам никого да плашам, но наредните месеци навистина би можеле да бидат критични, исто така и поради променливата природа на војната.“ Ваквите загрижености се особено изразени во балтичките држави“, изјави Туск за новинарите во петокот.
Полскиот портал „Онет“ објави дека извори блиски до претседателот Карол Навроцки наводно рекле дека САД постојано ја предупредувале Варшава за можен напад или план за дестабилизација.
Белата куќа и американскиот Стејт департмент не одговорија на прашањата на Би-Би-Си за овие тврдења.
Според информациите објавени од британските медиуми во петокот, можните сценарија вклучуваат напади врз полската инфраструктура со ракети или беспилотни летала, како и евентуално вметнување трупи на територијата на членка на НАТО.
Целта на ваквите потези, според истите извори, би била да се зголеми притисокот врз западните сојузници на Украина да ја намалат или запрат воената помош за Киев во војната што трае од 2022 година, по руската инвазија.
Туск одговори на оваа информација со порака за смиреност, но и претпазливост.
„Не треба да се плашиме, се подготвуваме за различни ситуации, но не можеме да ги игнорираме… Свесни сме за заканите, исто така благодарение на информациите од нашите сојузници“, рече полскиот премиер.
Претседателот Карол Навроцки ќе учествува на самитот на НАТО во Турција следната недела заедно со лидерите на земјите-членки на алијансата.
Генералниот секретар на НАТО, Марк Руте, рече дека самитот ќе покаже како европските земји реагираат на долгогодишните барања од американскиот претседател Доналд Трамп за зголемување на трошоците за одбрана, а се очекува и континуирана поддршка за Украина.
Туск го предупреди „Фајненшл тајмс“ во април дека Русија би можела да нападне членка на НАТО во рок од „неколку месеци“.
Неговиот заменик и министер за надворешни работи, Радек Сикорски, во јуни за „Си-Би-Ес њуз“ изјави дека не ја исклучува можноста за руска „операција под лажно знаме“ во следните две години.
