Полска вечер на „Охридско лето“ со уметниците од хармоникашкото „Моушн трио“

Музичката програмата на годинашното 65. издание на Фестивалот „Охридско лето“ ќе биде заокружена со концертот на „Моушн трио“ и уметниците Јануш Војтарович, Павел Баранек и Марчин Галажин на хармоника.

Настанот ќе се одржи во катедралната црква „Света Софија“, во 21 часот.

„Моушн трио“ е препознатливо по специфичниот звук што ја спојува страста и традицијата на Источна Европа со прецизноста на класичната музика. Основани во 1996 година, членовите – со класично образование на Краковската музичка академија – прво настапувале на европските улици, за потоа да се вивнат на светските сцени како респектиран ансамбл.

Под водство на Војтарович, триото често изведува сопствени композиции и ја проширува палетата на хармониката со минимализам, џез и рок елементи, а во поново време и со текстури инспирирани од техно. Се истакнуваат по жив, моќен звук постигнат исклучиво со хармоники – без семплери, лупови или други технолошки додатоци – што го поместува класичниот канон и ги редефинира можностите на инструментот. Нивните албуми се одлично оценети од стручната критика и наградувани и во класичната и во џез-сферата.

Критиката често ја опишува нивната енергија како спој меѓу виртуозитет на рецитал и интензитет на рок-концерт – формула по која „Моушн трио“ останува една од највозбудливите хармоникашки формации на актуелната сцена