Подготвени над 200 оброци, кои ќе бидат распределени во народните кујни на Скопската епархија

Денеска, скопскиот градоначалник, Орце Ѓорѓиевски и отец Оливер од хуманитарната организација „Свети Спас“ од Драчево подготвија над 200 оброци, кои ќе бидат распределени во пунктовите на народните кујни на Скопската епархија.

– Мал гест, но со силна порака дека живее човечноста и дека не згаснува добрината. Свесни сме дека не можеме да помогнеме насекаде и на сите. Но, можеме да дадеме сè од себе за оние на кои им е најпотребно, за нашите сограѓани да знаат дека не се сами. Го правиме токму тоа со срце, со искреност и со вера – изјави Ѓорѓиевски.

Тој додаде дека отец Оливер е човек кого е благослов да го имаш покрај себе, дека секојдневно сведочи за дела достојни за длабока почит и дека се заедно уште од самото формирање на организацијата.

– Зад нас стојат бројни хумани дела, а пред нас – уште многу можности да правиме добро. Така и ќе продолжиме. Затоа што само преку добри дела, без разлика на политичката, верската, етничката или каква било припадност, можеме да создадеме насмевки и да внесеме светлина таму каде што недостига таа – истакна Ѓорѓиевски.

Скопскиот градоначалник ги повикува сите што можат, што имаат и што во срцето носат желба да помогнат, да ѝ се приклучат на оваа благородна мисија.