Почна изградбата на модерен биопазар во Кавадарци

Во Кавадарци почна изградбата на нов, модерен биопазар, што, според градоначалникот Митко Јанчев, претставува инвестиција во здравјето, земјоделството и во локалниот развој.

Тој наведе дека овој пазар ќе биде прв од ваков вид во Тиквешкиот Регион.

Пазарот ќе биде изграден во зона со комерцијална и деловна намена, а ќе содржи простори за продажба на органски јаткасти плодови, мед, преработки, домашни производи, сирење, кашкавал, урда, путер од јаткасти плодови и слично. Притоа, објектот ќе биде поделен на 15 деловни единици.

– Овој проект има цел да обезбеди современ, уреден и сертификуван простор каде што локалните земјоделци, органските производители и малите семејни бизниси ќе можат директно да ги продаваат своите производи, без посредници, по фер цени, со зголемена доверба од потрошувачите. Со овој капитален проект, инвестираме во три столба: здравјето на граѓаните, економската моќ на нашите производители и одржливата иднина на Кавадарци. Ова е простор каде што локалното добива вистинско значење .Проектот е дел од визијата за Кавадарци како еколошки одговорна и економски динамична општина, која ги поттикнува локалните производители, го скратува синџирот на снабдување и ја зголемува свесноста за здравите животни навики – истакна Јанчев.