Почина најтешкиот човек на светот – кога стана светски рекордер тежеше 590 килограми

Најтешкиот човек на светот, Мексиканецот Хуан Педро Франко, кој во еден момент тежеше 590 килограми, почина на 41-годишна возраст од компликации од инфекција на бубрезите, објавија денес лекарите, пренесе „Сан“.

Франко почина на 24 декември во болница во мексиканската држава Агуаскалиентес, откако неговата здравствена состојба нагло се влоши поради компликации поврзани со инфекција на бубрезите, објавија локалните медиуми.

Неговиот лекар, Хозе Антонио Кастањеда, рече дека системските компликации се развиле во деновите пред неговата смрт.

Во 2017 година, Гинисовата книга на рекорди го прогласи Франко за најтешкиот жив човек на светот, привлекувајќи светско внимание кон неговиот случај.

Во еден момент, тој тежеше дури 590 килограми, што е приближно колку тежината на „Мини Купер“.

Поради неговата екстремна дебелина, тој беше врзан за кревет со години и не можеше сам да се движи.

Решен да го подобри своето здравје, тој започна интензивна медицинска програма за слабеење под постојан надзор на лекарите.

Планот за лекување вклучуваше посебна диета, како и две баријатриски операции – инсталација на гастричен ракав, а потоа и гастричен бајпас.

Благодарение на терапијата, тој изгуби речиси половина од телесната тежина и повторно можеше да оди.

Зборувајќи за животот со дебелина, Франко претходно рече дека се обидел да држи диета, но без успех, што го довело до очај.

По операциите, тој нагласи дека способноста за самостојно движење значително му го подобрила квалитетот на живот.

Лекарите велат дека губењето на тежината го намалило ризикот од дијабетес и оптоварувањето на кардиоваскуларниот систем, но дека долгата историја на болести на Франко го направила особено ранлив.