Почина модниот дизајнер Џорџо Армани

На 91 година почина познатиот италијански моден дизајнер Џорџо Армани.

„Со огромна тага, групацијата Армани објавува дека креаторот, основачот и неуморниот двигател, Џорџо Армани нè напушти“, пишува во соопштението на групацијата.

Џорџо Армани е роден на 11 јули 1934 г., во Пјаченца (Piacenza) Италија.

За прв пат се стекнал со слава работејќи за Серути, а потоа и за многу други, вклучувајќи ги Алегри, Багута и Хилтон. Ја формирал својата компанија Армани во 1975 година, која се проширила и во дејностите музика, спорт и луксузни хотели. До 2001 година Армани бил прогласен за најуспешен дизајнер со италијанско потекло и е заслужен за пионерската мода на црвениот тепих. Според индексот на милијардери на Блумберг, Армани има проценета нето вредност од 9,53 милијарди американски долари, заклучно со 2021 година.