Почина легендарниот гитарист и основач на бендот КИС

Ејс Фрејли, легендарниот гитарист и еден од основачите на познатиот бенд KISS, почина на 74-годишна возраст.

Иконата на познатиот бенд KISS беше на апарати за одржување во живот откако доживеа тешко крварење во мозокот. Тој беше хоспитализиран и ставен на респиратор. Членовите на неговото семејство донесоа тешка одлука да ги исклучат апаратите за одржување во живот, објави Дејли Меил.

Според истиот извор, музичарот загубил свест во своето домашно студио пред неколку недели и ја удрил главата при ужасен пад што предизвикал здравствена криза. Оттогаш, состојбата на Фрејли се влошила, принудувајќи ја рокенрол иконата да ги откаже сите претстојни датуми на турнејата.

Извори блиски до музичарот рекоа дека тој бил на респиратор со денови, додека лекарите забележале многу малку подобрување. По падот, тимот на Фрејли првично се обидел да ја намали сериозноста на неговата состојба.

На 25 септември, неговиот официјален Инстаграм профил објави соопштение во кое ги уверува обожавателите дека е „добро“, а лекарите му наредиле да не патува.

Само една недела подоцна, нова објава потврди дека тој ги откажува сите преостанати датуми за турнејата за 2025 година, наведувајќи „тековни здравствени проблеми“.

Во рок светот брзо се раширија гласини дека Фрели починал, откако ветеранот музички новинар Мич Лафон објави порака на мрежата X: „Ејс, ти благодарам за музиката и спомените. Бог да те благослови“.

За потсетување, познатиот Џин Симонс од групата „KISS“ беше однесен во болница откако беше вклучен во сообраќајна несреќа во Малибу во вторникот.