По повод одбележувањето 120 години од погибелта на македонскиот војвода Александар Турунџев, вечерва со свечена церемонија беше откриен споменик на овој национален херој и симбол на борбата за слобода на македонскиот народовој, на Ат – Пазар, во Битола.
Градоначалникот на Општина Битола, Тони Коњановски, заедно со потомци од семејството Турунџиеви, пред мноштво битолчани и гости го открија споменикот на војводата, на што му претходеше посебен настан збогатен со историска симболика.
“Токму на денот на погибието пред 120 години, на овој 30 август, Битола ја исправи својата вечна должност и му подари споменик на Александар Турунџев”, порача градоначалникот Коњановски, стои во објавата на фејсбук профилот на Општина Битола.
На свечениот настан му претходеше дефиле низ битолските улици, проткаено со историски факти. На почеток, како што е наведено, граѓаните се собраа пред ОУ „Ѓорги Сугарев“, местото каде Турунџев бил затворен, каде што беше развеано македонското знаме од млади момчиња облечени во комитска униформа, членови на КУД „Илинден“ Битола.
Дефилето беше придружувано од дувачки оркестар и групата Љубојна, како и млади зурлаџии и тапанџии од АФ „Гоце Делчев“ Битола, а предводник на поворката беше коњичката „Костурска чета“. Голем број граѓани се приклучуваа на поворката која се движеше низ Плоштадот „Магнолија“, покрај реката Драгор до Ат Пазар каде што војводата беше погубен, па до новиот кружен тек каде е поставен споменикот на Турунџев.
На сцената македонската државна химна ја отпеа правнуката на Турунџев, пејачката Сузана Турунџиева, а оперскиот пејач Игор Дурловски во аранжман на Николче Мицевски ја изведе песната посветена на војводата Турунџев – „Црно му било пишано“.
Вчера на неговиот гроб кој се наоѓа во црквата „Св. Недела“ во Битола, се одржа панихида на која присуствуваа градоначалникот на Општина Битола, Тони Коњановски, претставници на локалната власт, на повеќе институции, како и граѓани кои му оддадоа почит на споменот на Турунџев.
Македонскиот револуционер, ајдутин, четник и војвода Александар Турунџев, бил предаден на турските власти за 150 златници од свој сонародник, по што бил обесен на Ат-Пазар во Битола на 30 август 1905 година. Турунџев, покрај тоа што се смета за симбол на она што често се провлекува низ македонската историја – предавството, многу повеќе е национален херој и симбол на борбата за слобода на македонскиот народ.
