Словачка го промени Уставот и отсега законот во оваа европска земја признава само два пола – машки и женски.
Промената, која беше изгласана во парламентот со тесно мнозинство, исто така забранува сурогат мајчинство и дозволува посвојување деца само од хетеросексуални брачни двојки, објави „Би-би-си“.
Уставните измени се дефинирани како зајакнување на „културниот и етничкиот суверенитет“.
Но, критичарите на законот, вклучувајќи ја и „Амнести Интернешнл“, предупредуваат дека тоа ќе им го отежни животот на членовите на ЛГБТ заедницата и ќе го доближи законодавството на Словачка до она на Унгарија или Русија.
Усвојувањето на промените дојде како изненадување, дури и премиерот Роберт Фицо во четврток призна дека парламентот можеби нема да може да го усвои.
На неговата влада, составена од популистички, левичарски и националистички партии, ѝ беа потребни најмалку 90 од 150 гласови во парламентот за да го усвои, а коалицијата контролира само 78 места.
Сепак, 12 пратеници од опозицијата гласаа за предлогот.
Ова се очекуваше од конзервативните демохристијани, но неколку членови на движењето „Обични луѓе“ на поранешниот премиер Игор Матович, исто така, ги поддржаа уставните измени во последен момент, менувајќи го балансот на моќта.
Матович подоцна ги нарече предавници.
Популистичките и националистичките влади веруваат дека промените се потребни за заштита на „традиционалните вредности“.
Премиерот Фицо го поздрави усвојувањето на Уставот и додаде дека неговата партија ќе го прослави успехот со чаша жесток пијалок.
„Ова не е само мала брана или обична брана, туку голема брана против прогресивизмот“, додаде тој.
Тој претходно тврдеше дека либералната идеологија „се шири како рак“.
Словачките адвокати веруваат дека промените го зајакнуваат приматот на домашниот Устав над правото на Европската унија и дека ова е шлаканица за Брисел, што би можело да предизвика правни битки и можни санкции.
Некои, исто така, веруваат дека овој потег е обид на Фицо да го одвлече вниманието на јавноста од неговите непопуларни мерки, кои предизвикаа пад на неговиот рејтинг.
„Словачкиот устав е жртва на планот на Роберт Фицо да ја ослаби опозицијата и да го одвлече вниманието од вистинските проблеми во општеството, како и од мерките за штедење што мораше да ги воведе“, изјави за „Би-Би-Си“ Беата Балагова, уредничка на словачкиот весник SME.
„Фицо навистина не се грижи за родовите прашања, сурогат мајчинството, па дури и посвојувањето за ЛГБТ двојки“, додаде таа.
Повеќето пратеници од опозицијата не присуствуваа на гласањето, а Прогресивна Словачка, која според анкетите на јавното мислење има најголема поддршка од која било друга партија, рече дека предавството од страна на пратениците на Матович е знак дека повеќе нема можност за соработка со нив.
Сепак, претседателот Петер Пелегрини ќе го потпише документот за усвојување на законот.
