По инцидентите во Србија: Приведени се 114 лица, меѓу кои и тројца странски државјани, а повредени се 75 полицајци

Министерот за внатрешни работи Ивица Дачиќ изјави дека по синоќешните инциденти за време на протестите во неколку градови во Србија, приведени се 114 лица, меѓу кои и тројца странски државјани, дека се поднесени 34 кривични и 28 прекршочни пријави и дека 75 полицајци се повредени во, како што рече, нападите од страна на блокадите на демонстрантите.

Во обраќањето од Палатата на Србија во Белград, Дачиќ рече дека се приведени и граѓани на Хрватска, Словенија и Италија.

„Што бара хрватски државјанин на протест и ја напаѓа жандармеријата? Замислете некој Србин од тука да отиде во Загреб и да ја нападне нивната полиција. Па, тие ги фрлаат нашите луѓе во морето во Сплит кога доаѓаат на одмор. Тој доаѓа од Хрватска специјално за тоа и ја напаѓа жандармеријата. И тоа е полициска бруталност“, рече Дачиќ.

Тој наведе дека приведениот државјанин на Словенија е со српско потекло и дека „ги завршил своите разузнавачки студии во САД“.

„Толку за фактот дека нема вклучен странски фактор“, рече министерот.

Тој оцени дека синоќешните инциденти претставуваат „брутален напад врз полицијата и државата Србија“.

Дачиќ додаде дека во претходните три дена, 121 полицаец беше повреден во инциденти на протестите низ Србија, од кои девет сериозно.

„Демонстрантите со блокада дојдоа синоќа да ја нападнат полицијата, со намера да ги повредат полицајците. Немаше никаква полициска интервенција никаде пред да бидат нападнати“, рече министерот.