По гладот и уништувањето Газа се соочува со нов бран на болести отпорни на антибиотици

Газа се соочува со нова закана бидејќи болестите отпорни на антибиотици се шират низ опустошената територија, открива истражувањето.

Медицинските материјали се оскудни, а десетици илјади луѓе се повредени во 22-месечната војна, додека многу други се чувствуваат слаби поради неухранетоста, па затоа високите нивоа на бактерии отпорни на лекови ќе значат подолги и посериозни болести, побрзо пренесување на заразни болести и повеќе смртни случаи, велат експертите.

Наодите, објавени во вторник во рецензиран истражувачки коментар во списанието „Лансет инфективни болести“, се првите од почетокот на конфликтот во октомври 2023 година што укажуваат на распространетоста на бактерии отпорни на повеќе лекови во Газа.

– Ова ќе значи подолги и посериозни болести и висок ризик од пренесување на други. Ова значи зголемен ризик од смрт од навистина чести инфекции. Тоа значи повеќе ампутации. Тоа е ужасна слика – рече Кристел Мусали, консултант за епидемиологија во „Лекари без граници“ и коавтор на студии за бактерии отпорни на лекови во Газа и други конфликтни зони на Блискиот Исток.

Студијата е базирана на повеќе од 1.300 примероци од болницата Ал-Ахли, дом на една од ретките микробиолошки лаборатории што сè уште функционираат во Газа. Две третини од примероците земени од пациенти во период од 10 месеци минатата година покажаа присуство на бактерии отпорни на повеќе лекови.

Газа со децении страда од високи нивоа на бактерии отпорни на повеќе лекови како резултат на повторени конфликти и израелска блокада од 2007 година, кога Хамас ја презеде контролата.

Но, сегашниот контекст беше без преседан, велат експертите. Не само што здравствениот систем во Газа е десеткуван, туку и санитарните системи се уништени, отстранувањето на ѓубрето и цврстиот отпад речиси престана, а гладот е широко распространет меѓу 2,3 милиони жители, оставајќи многумина ранливи на инфекции, пишува „Гардијан“.