По експресниот пат, сега се гради обиколницата на Крива Паланка

ПАТУВАЊЕТО ОД СКОПЈЕ ЌЕ БИДЕ ПОБРЗО И ПОБЕЗБЕДНО

Од страна на

29/08/2025 15:58

1254

За рехабилитација на обиколницата ќе се потрошат 1,12 милиони евра. Тоа ќе биде продолжение на експресниот пат од Страцин со што возењето од Скопје до Крива Паланка ќе биде побрзо и побезбедно

Почна рехабилитацијата на обиколницата на Крива Паланка, проект кој се надоврзува на модерниот експресен пат од Страцин, со кој патувањето од Скопје до овој град на североистокот на државата ќе биде побрзо и попријатно. Ова го истакна министерот за транспорт и врски, Александар Николоски, при посетата на Крива Паланка. Оваа општина, како што нагласи, доби од државата рекордни 200 милиони денари за инфраструктурни проекти, вклучително и обиколницата.

– Тоа е логичен сплет на големиот проект кој беше пуштен во јануари оваа година, а тоа е експресниот пат од Страцин до Крива Паланка, експресен пат кој веќе го менува животот за овој дел од Македонија. Веќе со едно пријатно возење се стигнува од Скопје до Крива Паланка, изјави тој.

Тој заедно со премиерот Христијан Мицкоски и директорот на ЈП за државни патишта, Коце Трајановски, извршија увид во рехабилитацијата на овој патен правец како дел од Коридор 8. Проектот се реализира преку ЈП за државни патишта, а инвестицијата е преку 68,5 милиони денари или околу 1,12 милиони евра. Работите треба да завршат во рок од 6 месеци.

– Ширината на делницата е 7,50 метри, односно таа е со две коловозни ленти со широчина од 3,50 метри. За време на рехабилитацијата, главните градежни работи на трасата ќе бидат целосно вадење на стариот асфалт, воспоставување на двослоен асфалт, битуменизиран носив слој со дебелина од 8 сантиметри и абечки слој со дебелина од 6 сантиметри. Долж трасата на делницата има пет пропуста, два моста, и еден потпатник, кои исто така се дел од реконструкцијата и ќе се врши нивно зајакнување. Во однос на сообраќајната сигнализација е предвидена нова современа вертикална и хоризонтална сигнализација по европски стандарди, како и нова челична заштитна ограда согласно со Европските стандарди ЕН1317 – објасни Трајановски.