По 73 години забрана, алкохолот тивко влегува во Саудиска Арабија

Саудиска Арабија планира да отвори две нови продавници за алкохол, вклучувајќи една за немуслиманскиот странски персонал во државниот нафтен гигант „Арамко“, додека кралството дополнително ги ублажува ограничувањата, изјавија за „Ројтерс“ извори запознаени со плановите.

Отворањето продавници во источната покраина Дахаран и една за дипломати во пристаништето Џеда би претставувало уште една пресвртница во напорите предводени од престолонаследникот, Мохамед бин Салман, за отворање на земјата.

Кралството, родното место на исламот, минатата година отвори продавница за алкохол за немуслимански дипломати во главниот град Ријад – прва таква откако беше воведена забрана пред 73 години. Новата продавница во Дахаран ќе биде сместена во комплекс во сопственост на „Арамко“, изјави еден од тројцата соговорници на британската агенција. Два извора изјавија дека се работи на отворање трета продавница за алкохол за немуслимански дипломати во градот Џеда, каде што многу мисии имаат почесни конзули.

По отворањето на првата продавница за алкохол во Ријад, сместена во незабележлива зграда во дипломатскиот кварт што некои дипломати ја нарекуваат „бункер за алкохол“, немаше официјално објавени измени во прописите. Пред да се отвори таа продавница, алкохолот, главно, беше достапен само преку дипломатска поштa, црниот пазар или домашно производство. Во другите земји од Персискиот Залив, освен Кувајт, алкохолот е достапен со одредени ограничувања.

Иако алкохолните пијалаци остануваат недостапни за огромното мнозинство од населението, според реформите на Мохамед бин Салман, и Саудијците и странците сега можат да учествуваат активности кои некогаш беа незамисливи – од танцување на пустински рејв журки до одење во кино. Меѓу реформите се и дозволувањето на жените да возат од 2017 година, ублажувањето на правилата за одвојување на мажите и жените на јавни места и значителното намалување на овластувањата на верската полиција.

Кралството ги ублажува ограничувањата за да привлече туристи и меѓународни компании како дел од амбициозен план за диверзификација на економијата и за намалување на зависноста од нафта. Општествената либерализација напредува со неверојатна брзина, но раководството има постепен и повнимателен пристап кога станува збор за алкохолот, пишува „Ројтерс“. Саудиска Арабија агресивно ја шири својата туристичка понуда преку огромниот развоен проект „Црвено Море глобал“, кој вклучува планови за отворање на 17 нови хотели до следниот мај. Овие ултралуксузни одморалишта и понатаму ќе бидат без алкохол. На прашањето на „Ројтерс“ дали има планови за ублажување на ограничувањата за алкохол за привлекување странски посетители, саудискиот министер за туризам, Ахмед Ал-Катиб, рече: „Разбираме дека некои меѓународни патници сакаат да консумираат алкохол кога ги посетуваат саудиските дестинации, но сè уште ништо не се сменило“. На дополнителното прашање дали „сè уште“ значи дека тоа би можело наскоро да се смени, тој одговори: „Ви препуштам вам да го протолкувате тоа“.