По 61 година, учениците од Црешево, Виниче и од Смилковци, кои го поминуваат своето основно образование во училиштето „Наум Охридски“ во Црешево, ќе добијат училишна сала, согласно со сите европски стандарди.
Салата се гради на површина од 646 квадратни метри и ќе биде целосно приспособена за спортски активности: кошарка, ракомет и мал фудбал. Покрај главниот терен, во салата ќе има: гардероби, место за спортски реквизити, санитарии со тушеви, како и кабинет за наставниците.
Градоначалникот на Општина Гази Баба, Бобан Стефковски, заедно со министерката за образование, Весна Јаневска, вчера изврши увид во градежните активности во салата.
– Иднината на државата се создава во училиштата и затоа е од исклучителна важност сите деца да имаат пристојни услови за едукација, а нивните наставници да бидат мотивирани и да имаат можности добро да ја извршуваат својата благородна мисија. Како влада, ѝ се посветивме на инфраструктурата во образованието и во изминатите 16 месеци вложивме 67 милиони евра – 32 преку Министерството за образование и наука и 35 милиони евра преку повикот на Владата за распределба на средства кон општините за образовни проекти. Инвестицијата во спортската сала е токму резултат на добрата соработка помеѓу Владата и општината, а објектот ќе овозможи квалитетна реализација на наставата по физичко образование, но и ќе поттикне поголема физичка активност и спортување на децата по завршувањето на часовите – истакна Јаневска, потенцирајќи дека квалитетната спортска инфраструктура придонесува за градење здрави генерации со вистински вредности: со натпреварувачки дух, упорност, тимска работа, емпатија и со меѓусебна почит.
Министерката најави дека со зголемен буџет за овој ресор, во текот на мандатот Владата ќе изгради уште 30 училишни спортски сали и дека ќе се реконструира 15 постојни во различни општини.
Градоначалникот Стефковски информираше дeка средствата за овој објект во висина од 34 милиони денари се обезбедени преку владиниот повик за распределба на средства по општините за инфраструктурни проекти. Се очекува спортската сала да биде завршена во втората половина на 2026 година.
