Социјалдемократската партија на данската премиерка Мете Фредериксен претрпе големи загуби на локалните избори, губејќи клучни градови, вклучувајќи го и Копенхаген, каде што тие се на власт континуирано од 1903 година, објавува „Политико“.
„Очекувавме загуби, но падот е поголем отколку што мислевме“, им рече Фредериксен на поддржувачите на партискиот митинг во Копенхаген.
Иако социјалдемократите остануваат најпопуларната политичка група во Данска со околу 23 проценти од гласовите, поддршката за партијата опадна во 87 од 98 општини во земјата од претходните локални избори.
Фредериксен рече дека „ја презема одговорноста“ за изборниот дебакл и додаде дека „внимателно ќе размисли што стои зад него“, особено со парламентарните избори следната година.
Високите трошоци за домување доминираа во кампањата во најголемите општини во Данска, а гласачите беа огорчени од одговорот на националната влада. Во Копенхаген, каде што цените на недвижностите се зголемија за 20 проценти во изминатата година, само 12,7 проценти од гласачите ја поддржаа партијата на премиерот.
По 122 години владеење на социјалдемократите во Копенхаген, кандидатката на партијата, Пернил Розенкранц-Тајл, дури и не беше поканета да присуствува на преговорите за формирање на следната влада на градот. Сисе Мари Велинг, чија Социјалистичка народна партија оствари најголеми добивки на изборите, ќе биде новата градоначалничка на Копенхаген, а владината коалиција ќе вклучува шест партии.
На национално ниво, се очекува социјалдемократите да ја задржат власта во 26 од 98 општини, во споредба со досегашните 44 градоначалници.
