Под „Ат-пазар“ во Битола е откриен споменикот на револуционерот Александар Турунџев и на него е напишано на плоча „Македонија ќе биде слободна“, како и дел од стиховите од песната посветена на неговата погибел пред 120 години. Токму напишаното на споменикот предизвика серија на критики за фонтот и обвинувања за сквернавење на македонскиот јазик. Од Општина Битола веднаш реагираа и најавија дека ќе ја заменат плочата на споменикот со нова со современ македонски фонт, целосно усогласен со правописните норми.
Забелешките од граѓаните беа насочени кон тоа дека буквите изгледаат како да се напишани со туѓа ортографија. Според стручната лингвистичка анализа, сепак, станувало збор за декоративно типографско решение, во кое одредени форми визуелно наликуваат на латинични знаци, што создаде впечаток на погрешно напишани зборови.
– Имајќи ги предвид чувствителноста на прашањето и значењето на јазикот и писмото како дел од националниот идентитет, Општина Битола ќе изработи нова спомен-плоча со современ македонски фонт. Целта е да се избегне забуна и да се обезбеди јасна и прецизна јазична форма, како што прилега за јавните обележја што ја чуваат историската меморија – информираа од Општина Битола.
Општината додава дека останува посветена на негување на јазичната исправност, културната традиција и достоинственото чествување на хероите што се вградиле во слободата на Македонија.
Пред откривањето на споменикот на кој присуствуваа пратеници и советници од Битола, се одржа своевидна претстава поткрепена со историска симболика.
– Токму на денот на погибелта пред 120 години, на овој 30 август, Битола ја исправи својата вечна должност и му подари споменик на Александар Турунџев – порача градоначалникот Коњановски.
Граѓаните се собраа пред училиштето „Ѓорги Сугарев“, местото каде Турунџев бил затворен, каде беше развиорено македонското знаме од млади момчиња облечени во комитска носија, членови на КУД „Илинден“ Битола. Поворката беше придружувана со плех-музика и групата „Љубојна“ како и младите зурлаџии и тапанџии од АФ „Гоце Делчев“ Битола, а предводник на поворката беше коњаницата „Костурска чета“.
Сузана Турунџиева, потомок на војводата Александар Турунџев, со емотивна изведба ја отпеа македонската национална химна, поздравена од присутните.
