Пленковиќ тврди дека ги отстранил стравувањата на Србија за воена соработка со Тирана и Приштина

Хрватскиот премиер Андреј Пленковиќ во четвртокот во Њу Делхи изјави дека за време на разговорот со српскиот претседател Александар Вучиќ ги отфрлил стравувањата на Србија во врска со одбранбената соработка меѓу Хрватска, Албанија и Косово.

„Ги отстранивме стравувањата што, според нас, постојат во Србија во врска со соработката меѓу министерствата за одбрана на Хрватска, Косово и Албанија. Објаснив дека оваа соработка е насочена кон техничка соработка на нашите оддели и дека не е насочена на никаков начин против Србија. Сега, колку што видов од неговата изјава, таа е прифатена“, изјави Пленковиќ за новинарите на маргините на самитот за вештачка интелигенција во Њу Делхи.

Вучиќ во средата изјави дека Пленковиќ му рекол дека соработката меѓу Хрватска, Албанија и Косово не е насочена против Србија. Вучиќ во изјава за новинарите од белградските медиуми од Њу Делхи изјави дека „имал долг разговор со хрватскиот премиер Андреј Пленковиќ“ и дека за прв пат разговарале за „воениот сојуз на Тирана, Загреб и Приштина“.

Претходно, српскиот претседател, учествувајќи на Минхенската безбедносна конференција, рече дека најголемата закана за Србија е токму тој „воен сојуз“.

Минатата година, Хрватска, Албанија и Косово ја потпишаа Декларацијата за соработка во областа на одбраната и безбедноста, за која се вели дека е насочена кон стабилност и безбедност во Југоисточна Европа, поддршка на евроатлантскиот пат и зајакнување на соработката и сојузништвото меѓу трите пријателски земји.