Европската унија (ЕУ) го засилува притисокот врз владите на земјите-членки кои се двоумат да постигнат договор за здружување и испраќање финансиска помош за разорената Украина, велејќи им дека ако не ја натераат Русија да ги плати трошоците за војната, ќе мора сами да ги платат.
Европската комисија е добро свесна дека нејзиниот резервен план – заедничко европско задолжување преку таканаречените еврообврзници – беше уште понепопуларен начин за финансирање на заем за реконструкција од 140 милијарди евра за Киев отколку користењето на замрзнатите руски државни средства, што наиде на пречки минатата недела, пишува бриселскиот весник „Политико“.
Земјите кои традиционално се противат на големото трошење, особено Германија и Холандија, познати како „штедливи“, се ужаснати од можноста граѓаните да бидат оптоварени со уште поголем јавен долг. Од друга страна, Франција и Италија, кои се сметаат за расипнички земји, веќе се премногу задолжени за да го преземат дополнителниот товар. Но, токму тоа е поентата, наведува весникот.
Европските претставници сметаат дека Белгија, каде што се наоѓаат речиси сите руски средства и која изрази сомнежи за легитимноста на нивната конфискација, како и другите земји кои ги изразија своите резерви потивко, сепак ќе бидат привлечени од планот за користење на руските средства, кога ќе се соочат со алтернативата – заедничко задолжување, кое го сметаат за токсично со години.
Европските влади и Европската централна банка постепено ја прифатија идејата за користење на запленети руски средства за финансирање на заем од 140 милијарди евра.
На почетокот беа многу претпазливи, бидејќи крадењето пари на друга земја – без разлика колку нечесна изгледаше таа земја – се сметаше за правно и морално сомнително. Но, итните потреби на Украина, како и неодлучниот пристап на Вашингтон, го променија нивниот став, пишува „Политико“.
Донесувањето одлуки во рамките на ЕУ би можело да стане уште потешко, бидејќи Унгарија планира да се придружи на Чешка и Словачка во „антиукраински“ сојуз
Сега во Брисел постои чувство на итност – „сега или никогаш“. Како резултат на тоа, претставниците на Комисијата се принудени да постигнат деликатна рамнотежа додека се обидуваат да го протуркаат планот за средства, рекоа тројца дипломати на ЕУ запознаени со ова прашање.
– Ова е дипломатија. Им нудите на луѓето нешто што не сакаат да го прават, а потоа тие прифаќаат нешто друго, што го сакаат уште помалку – рече еден од дипломатите кој сакаше да остане анонимен, додека друг смета дека идејата за еврообврзници е „едноставно смешна“.
Многу европски земји долго време се спротивставуваа на идејата за еврообврзници, верувајќи дека не треба да го носат товарот на задолжените влади за кои сметаат дека се неспособни да ги држат своите финансии под контрола.
Пандемијата на коронавирусот го ослабна нивниот отпор, бидејќи владите се согласија за заедничко задолжување за финансирање на фонд за закрепнување од 800 милијарди евра за обнова на економијата на блокот.
