Од планинарскиот клуб „Љуботен“ велат дека документарецот го следи развојот на клубот од неговото основање во 1925 година, преку изградбата на домовите на Шар Планина, до денешните генерации, кои ја продолжуваат традицијата. Филмот е направен врз личните сведоштва на активните членови, архивски снимки и современи кадри и прикажува еден век љубов кон планината, истрајност, пријателство и посветеност кон заедницата. – Ова е редок настан, кој се случува во Македонија, значаен за планинарството, планинскиот туризам, градот Тетово и за целата држава. Кога ќе застанеш на врвот и ќе ја почувствуваш тишината на планината, сфаќаш дека ова не е само клуб. Ова е семејство, ова е љубов што трае 100 години – вели Јован Божиновски, претседател на клубот
Планинарскиот клуб „Љуботен“ од Тетово, најстариот планинарски клуб во Македонија, годинава одбележува еден век постоење со документарен филм, кој првпат во земјава ги прикажува животот, предизвиците и подвизите на едно планинарско друштво.
Од клубот велат дека документарецот го следи развојот на клубот од неговото основање во 1925 година, преку изградбата на домовите на Шар Планина, до денешните генерации, кои ја продолжуваат традицијата.
Филмот е направен врз личните сведоштва на активните членови, архивски снимки и современи кадри и прикажува еден век љубов кон планината, истрајност, пријателство и посветеност кон заедницата.
– Ова е редок настан, кој се случува во Македонија, значаен за планинарството, планинскиот туризам, градот Тетово и за целата држава. Кога ќе застанеш на врвот и ќе ја почувствуваш тишината на планината, сфаќаш дека ова не е само клуб. Ова е семејство, ова е љубов што трае 100 години – вели Јован Божиновски, претседател на клубот.
На 23 март 1925 година, група визионери од Тетово, предводени од шумарскиот инженер Орестије Крстиќ, го формирале тогашното Планинарско-туристичко друштво „Љуботен“. Првите децении биле скромни, но полни со ентузијазам. Веќе во 1931 и 1934 година биле изградени првите планинарски домови во Македонија.
– Ако го земеме фактот што само шест години по формирањето никнале домови на Љуботен и на Попова Шапка, ќе сфатиме дека тие луѓе имале визија и свест за тоа што значи планинарството – не само како спорт туку и како култура и заедништво – објаснува Божиновски.
Во педесеттите години, клубот броел и по 950 члена. Од тогашните ентузијасти произлегле генерации што ги поставиле темелите на современото планинарство во земјава.
Филмот ја раскажува историјата низ пет епохи: од првите патеки по Шар Планина, скијачките подвизи пред Втората светска војна, па сè до новата доба на дигитални мапи и апликации.
Снимањето е реализирано на повеќе локации: во Тетово, Попова Шапка, Љуботен, Лешница, Маврово и Тетовско Кале, со што публиката добива целосна и жива слика за тоа како растел клубот, како се менувал и преживувал низ општествените и историските турбуленции.
Во документарецот се појавуваат и ретки архивски фотографии и видеа од искачувања на членовите на клубот на врвови како Килиманџаро (1988 година), Алпи (2019 и 2025 година).
Клубот денес има околу 150 активни члена, меѓу кои и осуммина професионални водичи со меѓународна IML-лиценца.
– Документарниот филм е омаж на Шар Планина – врвовите, долините, изворите и луѓето што ги поврзува. Тоа е приказна за љубов што трае 100 години и што ќе продолжи и во следниот век. Иднината на клубот е во рацете на следните генерации. Но, ако научивме нешто во првиот век тоа е дека љубовта кон планината не се гаси. Таа само расте – изјави Божиновски.
Дел од документарниот филм за 100 години постоење на планинарскиот клуб „Љуботен“ премиерно ќе биде прикажан на свечената академија на 15 ноември 2025 година.
