Планинари и рекреативци и годинава поминаа по Милениумската патека на Сува Гора

Успешно се одржа планинарската акција „Милениумска патека“ на планината Сува Гора, која осма година по ред беше организирана од планинарскиот клуб „Јелак“ од Тетово.

Оваа планинарска тура, која е наменета за почетници и рекреативци, претставува можност за запознавање со големото и богато културно наследство на овој регион и воедно има едукативен карактер.

– „Милениумска патека“ првпат ја организиравме во 2018 година, на иницијатива од Kомисијата за односи со верските заедници и религиозните групи, како и МПЦ. Маршрутата започнува во селото Блаце, а завршува во селото Волковија, поминувајќи покрај цркви и низ природните убави на оваа планина. Времето беше многу убаво, сите што ја почнаа патеката, ја завршија на крајната дестинација – црквата „Свети Мина“ во Волковија – изјави Борис Стојановски, претседател на ПК „Јелак“.

Годинава клубот евидентираше дека 154 планинари поминале по патеката. Како и секоја година досега, по организираниот превоз од Тетово, движењето низ шумските предели почна од крајот на селото Блаце. Таму прво се стигна до месноста Самовилска Вода и до црквата „Света Троица“.

Од Самовилска Вода, колоната планинари се движеше низ шумските предели кон атарот на селото Стенче, поточно до црквата „Света Петка“.

– Овој предел претставува единствена нагорнина што ја искачуваат планинарите и претставува движење од 720 до 880 метри надморска височина. По краткиот престој, пак се движевме и стигнавме до археолошкиот локалитет – до месноста Граиште, исто во Стенче, каде што слушнавме за значењето на ова место во ранохристијанскиот период и ширењето на православната вера – истакна Стојановски.

Потоа следуваше пешачење до црквата „Свети Илија“ – за мал одмор, а најголемата пауза за одмор и јадење беше во кругот на црквата „Света Екатерина“. Крајниот дел од турата беше предвиден за посета на двете цркви во селото Волковија. Прво, месноста Волковска Чука и црквите „Свети Георги Победоносец“ и „Свети Мина“.