Здружението за уметност и култура „Music Connecting People“ по петти пат го организира фестивалот „Пикник у Пелинце“. Станува збор за музички фестивал што се одржува секое лето, а петтото јубилејно издание е закажано за 21 и 22 јуни непосредно до Меморијалниот центар АСНОМ.
Годинава ќе настапат 33 изведувачи од земјава и странство. Публиката ќе ужива во техномузиката, афро-техно, инди-денс, ќе настапат изведувачи за сечиј вкус.
– На целодневните настани е предвидено организирање на повеќе активности од областа на музиката, уметност, игри, како и камп зона. Ќе настапат локални и интернационални изведувачи кои ќе бидат задолжени за приредување на одлична забава за младите. Поддршка имаме од општините Куманово и Старо Нагоричане – изјави Јордан Алексиевски еден од организаторите.
За најмладите кумановци е предвидена и едукација која ќе ја спроведат стручни лица од едукативниот центар „Шаботиќ“. И годинава ќе има автобуски превоз, линии од Куманово (спортска сала) до Пелинце, термините можат да се видат на социјалните мрежи и веб-страницата на организаторите.
Изминативе години фестивалот го посетиле преку 12.000 луѓе од земјава и странство. „Пикник у Пелинце“ е поддржан и од општествено-одговорни компании.
