Денеска, 568 пензионери од Општина Гази Баба добија по 2.500 денари финансиска помош на своите сметки. Станува збор за пензионери со ниски пензии што се пријавија на јавниот повик на Општината.
– Пред само неколку дена, им беа исплатени средства на 510 пензионери, а со последнава исплата, вкупниот број изнесува 1.078 пензионери што добиле поддршка од Општината. Комисијата продолжува со работа и во следните денови ќе има нова исплата за наредната група пензионери. Помошта ќе продолжи сè до исплаќањето на сите 2.700 пријавени пензионери – информираа од Општина Гази Баба.
Оттаму велат дека ова не е првпат да им даваат поддршка на пензионерите со ниски примања. Во време на енергетската криза, беше обезбедена финансиска помош за трошоците за електрична енергија.
