Петмина средношколци загинаа во пожар во Барселона: Цигара е причината за трагедијата?

Пет средношколци на возраст меѓу 14 и 18 години загинаа во пожар во градот Манле во близина на Барселона, откако не можеа да избегаат од просторијата зафатена од пламен поради големата количина чад што брзо се ширеше во непроветрен магацин каде што се состануваа за време на нивното слободно време, соопшти каталонската полиција.

Полицијата соопшти дека се верува дека пожарот е предизвикан од цигара што запалила мебел и стари работи во соба на покривот на зграда во која се сместени ранливи семејства мигранти и каде што се наоѓаат некои станови, објави EFE.

Извори блиски до истрагата изјавија дека пожарот не бил проследен со никаков вид експлозија, и дека душеците и другите предмети натрупани во малата, непроветрена просторија што се запалила го забрзале согорувањето и предизвикале голем облак од чад.

Пожарот избувнал синоќа околу 21:00 часот во една од 40-те соби што се користат како магацин, сместена на покривот на зградата, а пет лица биле полесно повредени, од кои четворица биле локални полицајци и еден млад човек кој одбил да биде однесен во медицински центар.

Идентификацијата на жртвите сè уште не е завршена, но извори блиски до жртвите прецизираа дека станува збор за пет средношколци од земјите на Магреб, или северозападниот африкански регион, на возраст меѓу 14 и 18 години.

Градскиот совет на Манле прогласи тридневна жалост за трагичниот пожар.